കല്‍പ്പറ്റ: പൂക്കോട് കേരള വെറ്ററിനറി ആന്റ് അനിമല്‍ സയന്‍സസ് സര്‍വ്വകലാശാലയില്‍ സിപിഎം നേതാക്കള്‍ അവരുടെ ഇഷ്ടക്കാരെ നിയമിച്ചു പൊതുമുതല്‍ കൊള്ളയടിക്കാനുള്ള താവളമാക്കി മാറ്റുകയാണ്. ഇതിനെതിരെ ഗവര്‍ണ്ണര്‍ക്ക് പരാതി നല്‍കുവാന്‍ തീരുമാനിച്ചതായി ബിജെപി കല്‍പ്പറ്റ നിയോജക മണ്ഡലം കമ്മിറ്റി അറിയിച്ചു.
വയനാടിന് തന്നെ മുതല്‍ക്കൂട്ടാകുമായിരുന്ന ഒരു സ്ഥാപനമാണ് ഇത്. ഭരണ സ്വാധീനം ഉപയോഗിച്ചു കൊണ്ട് തികഞ്ഞ മാഫിയ സംഘമായി മാറിയ സിപിഎം വയനാട് ജില്ലാ നേതൃത്വം സ്ഥാപനം കൊള്ളയടിക്കുകയാണ്. നിലവില്‍ ഒഴിവുകള്‍ നികത്തുന്നതിനു വേണ്ടി ഇറക്കിയ സര്‍ക്കുലറില്‍ ക്ലാസ്സ് ഫോര്‍ ജീവനക്കാരെ സംബന്ധിച്ച കാര്യങ്ങള്‍ ഒഴിവാക്കിയത് തികച്ചും അഴിമതിയാണ്.
തസ്തികയില്‍ നിലവില്‍ കരാര്‍ അടിസ്ഥാനത്തില്‍ ജോലി ചെയ്യുന്ന സിപിഎം നേതാക്കളുടെയും വൈത്തിരി ഗ്രാമപഞ്ചായത്ത് ഭരണസമിതിയുടെ തലപ്പത്തുള്ളവരുടെയും ബന്ധുക്കളെ പിന്‍വാതിലിലൂടെ സ്ഥിരപ്പെടുത്താനും അതുവഴി ആ സ്ഥാപനത്തെ മാര്‍ക്‌സിസ്റ്റു പാര്‍ട്ടിയുടെ ഒരു ബ്രാഞ്ച് കമ്മിറ്റിയായി നിലനിര്‍ത്തുവാനുമുള്ള നീക്കമാണ് ഇത്. നാടിന്റെ നന്മക്ക് വിഘാതമാകുന്ന ഈ കുത്സിത പ്രവൃത്തിയെ എന്ത് വില കൊടുത്തും നേരിടുമെന്ന് ബിജെ പി കല്‍പ്പറ്റ നിയോജക മണ്ഡലം കമ്മിറ്റി പ്രസിഡന്റ് ടി.എം. സുബീഷ് പറഞ്ഞു. യോഗത്തില്‍ മണ്ഡലം ജനറല്‍ സെക്രട്ടറിമാരായ ഷാജിമോന്‍ ചൂരല്‍മല, എം.പി. സുകുമാരന്‍, മറ്റ് നേതാക്കളായ ശിവദാസന്‍. കെ, റിഷികുമാര്‍. എം, അനന്തന്‍. കെ. മുതലായവര്‍ സംബന്ധിച്ചു.
പ്രതികരിക്കാൻ ഇവിടെ എഴുതുക: