മോസ്‌കോ : ഇന്ത്യന്‍ പരമ്പരാഗത ശൈലിയെ റഷ്യയില്‍ ഉയര്‍ത്തിക്കാട്ടി കേന്ദ്ര പ്രതിരോധ മന്ത്രി രാജ്നാഥ് സിങ്. ഷാങ്ഹായ് കോര്‍പ്പറേഷന്‍ ഓര്‍ഗനൈസേഷന്‍ യോഗത്തില്‍ പങ്കെടുക്കാനെത്തവേ സ്വീകരിക്കാനെത്തിയ ഉദ്യോഗസ്ഥരെ രാജ്നാഥ് സിങ് ഇത്തവണ കൈകൂപ്പിയാണ് അഭിവാദ്യം ചെയ്തത്.
ലോകം മുഴുവന്‍ കോവിഡ് 19 ഭീതിയില്‍ കഴിയുന്നതിന്റെ പശ്ചാത്തലത്തിലാണ് അഭിവാദനത്തിനായി ഇന്ത്യന്‍ പരമ്പരാഗത രീതിയെ മന്ത്രി കൂട്ടുപിടിച്ചത്. മോസ്‌കോയില്‍ സ്വീകരിക്കാനെത്തിയ ഉദ്യോഗസ്ഥരുടെ നേരെ ഉപചാരപൂര്‍വം കൈകള്‍ കൂപ്പി അഭിവാദനം ചെയ്യുന്ന പ്രതിരോധമന്ത്രിയെയും അതേ രീതിയില്‍ ചില ഉദ്യോഗസ്ഥര്‍ അദ്ദേത്തെ പ്രത്യഭിവാദ്യം ചെയ്യുന്ന വീഡിയോ ദൃശ്യങ്ങളും പുറത്തുവന്നിട്ടുണ്ട്. ഇതില്‍ രാജ്നാഥ് സിങ്ങിനെ സല്യൂട്ട് നല്‍കി സ്വീകരിക്കുന്നതിനിടയില്‍ ഒരു ഉദ്യോഗസ്ഥന്‍ അറിയാതെ ഹസ്തദാനത്തിനായി കൈകള്‍ നീട്ടുന്നതും പെട്ടെന്ന് പിറകോട്ട് വലിക്കുന്നതും കാണാവുന്നതാണ്.
മോസ്‌കോയിലെത്തിയ രാജ്നാഥ് സിങ്ങിനെ മേജര്‍ ജനറല്‍ ബുഖ്തീവ് യുരി നിക്കോളെവിച്ചാണ് സ്വീകരിച്ചത്. ഇന്ത്യന്‍ അംബാസഡര്‍ ഡി.ബി.വെങ്കടഷ് വര്‍മയും ചടങ്ങില്‍ പങ്കെടുക്കുന്നുണ്ട്.
കോവിഡ് 19 വ്യപനത്തിന്റെ പശ്ചാത്തലത്തില്‍ അഭിവാദ്യത്തിനായി ഹസ്തദാനത്തിന് പകരം നമസ്‌തേ നല്‍കുന്ന ഇന്ത്യന്‍ പാരമ്പര്യ രീതി ഇതിനോടകം തന്നെ പല നേതാക്കളും ഏറ്റെടുത്തിരുന്നു. എട്ട് രാജ്യങ്ങളാണ് ഷാങ്ഹായ് കോര്‍പ്പറേഷനില്‍ ഉള്ളത്.
അംഗരാജ്യങ്ങളിലെ പ്രതിരോധ മന്ത്രിമാര്‍ തങ്ങള്‍ നേരിടുന്ന തീവ്രവാദം ഉള്‍പ്പടെയുളള സുരക്ഷാ വെല്ലുവിളികളെ കുറിച്ച് യോഗത്തില്‍ ചര്‍ച്ച ചെയ്യും. ചൈനീസ് പ്രതിരോധമന്ത്രി ഗെന്‍ വെയ് ഫെങ്ഘെ, പാക്കിസ്ഥാന്‍ മന്ത്രി പര്‍വേസ് ഖട്ടക്ക് എന്നിവര്‍ യോഗത്തില്‍ പങ്കെടുത്തേക്കും. ഇന്ത്യ- ചൈന അതിര്‍ത്തി തര്‍ക്കം നിലനില്‍ക്കേയാണ് ഇരുരാജ്യങ്ങളും പങ്കെടുക്കുന്ന അന്താരാഷ്‌ട്ര യോഗം നടക്കുന്നത്.
പ്രതികരിക്കാൻ ഇവിടെ എഴുതുക: