മുംബൈ: ബോളിവുഡ് താരം സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട് മുന്‍ കാമുകിയും നടിയുമായ റിയ ചക്രവര്‍ത്തിയെ രണ്ടാം ദിവസവും സിബിഐ ചോദ്യം ചെയ്യുന്നു. റിയയുടെ കൂട്ടാളിയായ സാമുവല്‍ മിറാന്‍ഡയെയും സിബിഐ ഡിആര്‍ഡിഒ ഗസ്റ്റ് ഹൗസില്‍ ചോദ്യം ചെയ്യല്‍ തുടരുന്നത്. റിയക്കെതിരെയുള്ള കൂടുതല്‍ തെളിവുകള്‍ ലഭിച്ചതോടെയാണ് രണ്ടാം ദിവസും ചോദ്യം ചെയ്യല്‍ തുടരുന്നത്.
സുശാന്തിനെ റിയ കൊലപ്പെടുത്തിയതാണെന്ന് താരത്തിന്റെ അച്ഛന്‍ കഴിഞ്ഞ ദിവസം ആരോപിച്ചിരുന്നു. കേസില്‍ ഉടന്‍ അന്വേഷണം പൂര്‍ത്തിയാക്കി റിയയെയും കൂട്ടരെയും അറസ്റ്റ് ചെയ്യണമെന്ന് സുശാന്തിന്റെ ബന്ധുവും ബിജെപി എംഎല്‍എയുമായ നീരജ് കുമാര്‍ സിങ് ഇന്നലെ ആവശ്യപ്പെട്ടു.
സുശാന്ത് സ്വന്തം കുടുംബവുമായി അടുപ്പത്തിലായിരുന്നില്ലെന്നടക്കം റിയ കഴിഞ്ഞ ദിവസം ഒരു ചാനലിന് നല്‍കിയ അഭിമുഖത്തില്‍ ആരോപിച്ചിരുന്നു. ഇതിനെതിരെ സുശാന്തിന്റെ സഹോദരി ശ്വേത സിങ് കീര്‍ത്തി രംഗത്തെത്തി. റിയ സുശാന്തിനെ ലഹരി മരുന്നുകള്‍ നല്‍കി മറ്റുള്ളവരില്‍ നിന്ന് അകറ്റി ഒറ്റപ്പെടുത്തിയെന്ന് അവര്‍ ട്വിറ്ററിലൂടെ ആരോപിച്ചു.
അതേസമയം, സുശാന്തിന്റെ കുടുംബത്തെ കേന്ദ്ര മന്ത്രി രാംദാസ് അത്വാലെ ഇന്നലെ ഫരീദാബാദില്‍ സന്ദര്‍ശിച്ചു. അച്ഛന്‍ കെ.കെ. സിങ്ങിനെയും സഹോദരി റാണി സിങ്ങിനെയും അദ്ദേഹം ആശ്വസിപ്പിച്ചു.
പ്രതികരിക്കാൻ ഇവിടെ എഴുതുക: