കിളിമാനൂര്‍: പഴയകുന്നുമ്മല്‍ പഞ്ചായത്തിലെ ആശാപ്രവര്‍ത്തക, ഒരു സന്നദ്ധ പ്രവര്‍ത്തകന്‍, കിളിമാനൂര്‍ സ്‌റ്റേഷനിലെ ഒരു സിവില്‍ പോലീസ് ഉദ്യോഗസ്ഥന്‍ എന്നിവരടക്കം മൂന്നു പേര്‍ക്ക് കൊറോണ സ്ഥിരീകരിച്ചതിനെ തുടര്‍ന്ന് കിളിമാനൂര്‍ പ്രദേശം അതീവജാഗ്രതയില്‍. സന്നദ്ധ പ്രവര്‍ത്തകനുമായി നേരിട്ട് ഇടപെട്ട ഒരു വാര്‍ഡ് അംഗത്തോട് ക്വാറന്റൈനില്‍ പോകാന്‍ ആരോഗ്യവകുപ്പ് നിര്‍ദേശിച്ചു.
തട്ടത്തുമല ഗവ.സ്‌കൂളില്‍ വ്യാഴാഴ്ച നടത്തിയ സ്രവ പരിശോധനയിലാണ് മൂന്നുപേര്‍ക്കും പോസിറ്റീവ് സ്ഥിരീകരിച്ചത്. പഞ്ചായത്തിലെ അഞ്ചാം വാര്‍ഡില്‍ ഉള്‍പ്പെട്ടയാളാണ് ആരോഗ്യപ്രവര്‍ത്തക. കിളിമാനൂര്‍ പുതിയകാവ് മാര്‍ക്കറ്റിനടുത്ത് കഴിഞ്ഞയാഴ്ച നടന്ന മാല മോഷണ കേസിലെ പ്രതിക്ക് പോസിറ്റീവ് രേഖപ്പെടുത്തിയതോടെയാണ് ഇദ്ദേഹവുമായി സമ്പര്‍ക്കത്തിലായ പോലീസുകാര്‍ക്ക് ടെസ്റ്റ് നടത്തിയത്.
സിഐ, എസ്‌ഐ അടക്കം 13 പേര്‍ തട്ടത്തുമലയില്‍ സ്രവപരിശോധനയില്‍ പങ്കെടുത്തിരുന്നു. ബാക്കിയുള്ള പോലീസുകാര്‍ ചൊവ്വാഴ്ച കേശവപുരം സിഎച്ച്‌സി ില്‍ നടന്ന പരിശോധനയില്‍ സംബന്ധിച്ചിരുന്നു. മാല മോഷണക്കേസിലെ പ്രതിയുമായി അടുത്തിടപഴകിയവരടക്കം 30 ല്‍പ്പരം പോലീസുകാരുടെ ഫലം വരാനുണ്ട്.
ഇന്നലെ കേശവപുരത്ത് ആന്റിജന്‍ പരിശോധന നടത്തിയ 33 പേരുടെ ഫലം നെഗറ്റീവാണെന്നും 25 പേര്‍ക്ക് ആര്‍ടിപിസിആര്‍ ടെസ്റ്റാണ് നടത്തിയതെന്നും ഇതിന്റെ ഫലം മൂന്ന് ദിവസം കഴിഞ്ഞേ ലഭ്യമാകൂവെന്നും ആരോഗ്യ വകുപ്പ് അറിയിച്ചു. തട്ടത്തുമലയില്‍ കഴിഞ്ഞ ദിവസം നടന്ന സ്രവപരിശോധനാ പ്രവര്‍ത്തനങ്ങളിലടക്കം മുന്നില്‍ നിന്ന് പ്രവര്‍ത്തിച്ചയാളാണ് പോസിറ്റീവായ സന്നദ്ധപ്രവര്‍ത്തകന്‍.
പ്രതികരിക്കാൻ ഇവിടെ എഴുതുക: