തൃശൂര്‍: കേരളത്തില്‍ ആദ്യമായി കോവിഡ് രോഗികള്‍ക്ക് എല്ലാ ഐ.പി. ബെഡിലും പൈപ്പ്‌ലൈന്‍ വഴി ഓക്സിജന് ലഭ്യമാക്കുന്നതിനായി തൃശൂര്‍ മെഡിക്കല്‍ കോളജില്‍ ആരംഭിച്ച ‘പ്രാണ-എയര്‍ ഫോര്‍ കെയര്‍’ പദ്ധതി മാതൃകാ പദ്ധതിയാണെന്ന് ഉദ്ഘാടനം നിര്‍വഹിച്ച ആരോഗ്യ മന്ത്രി കെ.കെ. ശൈലജ.
കോവിഡ് ബാധിച്ച് മരണം സംഭവിക്കുന്നത് ശരീരത്തില്‍ ഓക്സിജന് കുറയുന്നത് കൊണ്ടാണ്. രോഗലക്ഷണം കാണിക്കാതെയാണ് ശരീരത്തില്‍ ഓക്സിജന് കുറയുന്നത്. ഓക്സിജന് കുറയുന്നില്ലെന്ന് ഉറപ്പുവരുത്തിയാല്‍ ഒരുപാട് രോഗികളെ നമുക്ക് രക്ഷിക്കാന്‍ കഴിയുമെന്നും മന്ത്രി പറഞ്ഞു.
ഗവ മെഡിക്കല്‍ കോളേജിലെ കോവിഡ് രോഗികള്‍ക്ക് ആവശ്യമായ ഓക്സിജന് കേന്ദ്രീകൃത ഓക്സിജന് പ്ലാന്റില്‍ നിന്നും പൈപ്പ് ലൈന്‍ മുഖേന എല്ലാ ഐ പി ബെഡുകളിലേക്കും നല്‍കുന്നതിനും അനുബന്ധ സൗകര്യങ്ങള്‍ ലഭ്യമാക്കുന്നതിനുള്ള പ്രത്യേക പദ്ധതിയാണിത്. മെഡിക്കല്‍ കോളേജ് രൂപീകരിച്ച പ്രത്യേക കമ്മിറ്റിയാണ് പദ്ധതിക്ക് നേതൃത്വം നല്‍കുന്നത്. പൊതുജന പങ്കാളിത്തത്തോടെ നാല് ഘട്ടങ്ങളായി പദ്ധതി പുരോഗമിക്കും. ചെറുതെന്നോ വലുതെന്നോ വ്യതാസമില്ലാതെയുള്ള സാമ്പത്തിക സഹായം ആര്‍ക്ക് വേണമെങ്കിലും സംഭാവന ചെയ്യാം.
ഒരു ബെഡ് സ്പോണ്‍സര്‍ ചെയ്യുന്നതിന് 12000 രൂപയാണ് നിശ്ചയിച്ചിട്ടുള്ളത്. രോഗികളുടെ ജീവന്‍ രക്ഷിക്കാന്‍ പ്രാണവായു നല്‍കാന്‍ സഹായം നല്‍കാന്‍ തയാറുള്ളവര്‍ സ്‌പോണ്‍സര്‍മാരായി മുന്നോട്ടുവരണമെന്ന് ആരോഗ്യമന്ത്രി അഭ്യര്‍ഥിച്ചു. നിലവില്‍ 1500 ബെഡുകളിലേക്കാണ് ഓക്സിജന് സൗകര്യം എത്തിക്കാനുള്ളത്. കോവിഡ് രോഗികള്‍ക്കായി മെഡിക്കല്‍ കോളജിന്റെ കീഴില്‍ സ്വകാര്യ വ്യക്തികളുടെയും സംഘടനകളുടെയും സഹായത്തോടെ പദ്ധതി പുരോഗമിക്കും. മൊത്തം പദ്ധതി തുക 2,18,70,800 രൂപ.
പ്രതികരിക്കാൻ ഇവിടെ എഴുതുക: