കണ്ണൂര്‍: ജില്ലയില്‍ 13 പേര്‍ക്ക് ഇന്നലെ കൊവിഡ് ബാധ സ്ഥിരീകരിച്ചു. ഇവരില്‍ ഒരാള്‍ വിദേശത്തു നിന്നും 10 പേര്‍ ഇതര സംസ്ഥാനങ്ങളില്‍ നിന്നും എത്തിയവരാണ്. രണ്ടു പേര്‍ക്ക് സമ്പര്‍ക്കം മൂലമാണ് രോഗബാധ. കൊവിഡ് ബാധിച്ച് വിവിധ ആശുപത്രികളില്‍ ചികിത്സയിലായിരുന്ന 22 പേര്‍ ഇന്നലെ രോഗമുക്തരായി.
കരിപ്പൂര്‍ വിമാനത്താവളം വഴി ജൂലൈ ഏഴിന് റിയാദില്‍ നിന്ന് എക്‌സ്‌വൈ 345 വിമാനത്തിലെത്തിയ എരമം കുറ്റൂര്‍ സ്വദേശി 29കാരനാണ് വിദേശത്ത് നിന്നെത്തിയത്. ജൂലൈ ഒന്‍പതിന് മഹാരാഷ്‌ട്രയില്‍ നിന്ന് നേത്രാവതി എക്‌സ്പ്രസിലെത്തിയ ചെമ്പിലോട് സ്വദേശി 43കാരന്‍, 13 ന് കണ്ണൂര്‍ വിമാനത്താവളം വഴി തെലങ്കാനയില്‍ നിന്നെത്തിയ മൊകേരി സ്വദേശികളായ 51കാരന്‍, 15കാരി, 19കാരി, 13കാരന്‍, പാട്യം സ്വദേശി 40കാരന്‍ (നിലവില്‍ താമസം മൊകേരിയില്‍), കര്‍ണാടക സ്വദേശി 50കാരന്‍ (നിലവില്‍ താമസം മൊകേരിയില്‍), ബെംഗളൂരുവില്‍ നിന്ന് 14ന് എത്തിയ കുന്നോത്ത്പറമ്പ് സ്വദേശി 33കാരന്‍, പാനൂര്‍ സ്വദേശി ഒന്‍പത് വയസ്സുകാരി, 15ന് എത്തിയ മുഴപ്പിലങ്ങാട് സ്വദേശി 42കാരന്‍ എന്നിവരാണ് ഇതര സംസ്ഥാനങ്ങളില്‍ നിന്നെത്തിയവര്‍.
കുന്നോത്തുപറമ്പ് സ്വദേശി ഒരു വയസ്സുകാരന്‍, ചാലക്കുടി സ്വദേശിയായ ഡിഎസ്‌സി ഉദ്യോഗസ്ഥന്‍ എന്നിവര്‍ക്കാണ് സമ്പര്‍ക്കത്തിലൂടെ രോഗബാധയുണ്ടായത്. ജില്ലയില്‍ കോവിഡ് ബാധിച്ചവരുടെ എണ്ണം 879 ആയി. ഇതില്‍ 533 പേര്‍ രോഗം ഭേദമായി ആശുപത്രി വിട്ടു.
കണ്ണൂര്‍ ഗവ.മെഡിക്കല്‍ കോളേജില്‍ ചികിത്സയിലായിരുന്ന ചൊക്ലി സ്വദേശി 61കാരന്‍, തലശ്ശേരി സ്വദേശി 43കാരന്‍, സിഐഎസ്എഫ് ഉദ്യോഗസ്ഥനായ 36കാരന്‍, ജില്ലാ ആയുര്‍വേദ കൊവിഡ് ഫസ്റ്റ് ലൈന്‍ ട്രീറ്റ്‌മെന്റ് സെന്ററില്‍ ചികിത്സയിലായിരുന്ന മട്ടന്നൂര്‍ സ്വദേശി 29കാരി, അഞ്ചരക്കണ്ടി ജില്ലാ കൊവിഡ് ട്രീറ്റ്‌മെന്റ് സെന്ററില്‍ ചികിത്സയിലായിരുന്ന ആലക്കോട് സ്വദേശി 37കാരന്‍, അഞ്ചരക്കണ്ടി സ്വദേശി 38കാരന്‍, ചൊക്ലി സ്വദേശി 18കാരന്‍, ചെമ്പിലോട് സ്വദേശി 29കാരി, മുണ്ടേരി സ്വദേശി 48കാരന്‍, സിഐഎസ്എഫ് ഉദ്യോഗസ്ഥരായ 31കാരന്‍, 28കാരന്‍, ജില്ലാ ആശുപത്രിയില്‍ ചികിത്സയിലായിരുന്ന മട്ടന്നൂര്‍ സ്വദേശി 35കാരന്‍, ആര്‍മി ഹോസ്പിറ്റലില്‍ ചികിത്സയിലായിരുന്ന ഒന്‍പത് ഡിഎസ്‌സി ഉദ്യോഗസ്ഥര്‍, മഞ്ചേരി ഗവ.മെഡിക്കല്‍ കോളേജില്‍ ചികിത്സയിലായിരുന്ന പിണറായി സ്വദേശി 60കാരി എന്നിവരാണ് ഇന്നലെ രോഗം ഭേദമായി വീടുകളിലേക്ക് മടങ്ങിയത്.
പുതുതായി കൊവിഡ് ബാധ റിപ്പോര്‍ട്ട് ചെയ്യപ്പെട്ട ജില്ലയിലെ രണ്ടു തദ്ദേശ സ്വയംഭരണ വാര്‍ഡുകള്‍ കൂടി കണ്ടെയിന്‍മെന്റ് സോണുകളായി ജില്ലാ കളക്ടര്‍ പ്രഖ്യാപിച്ചു. ചെമ്പിലോട് ഒന്‍പത്, എരമം കുറ്റൂര്‍ 11 എന്നീ വാര്‍ഡുകളാണ് പുതുതായി കണ്ടെയിന്‍മെന്റ് സോണുകളായത്.
ഇവിടങ്ങളില്‍ വിദേശ രാജ്യങ്ങളില്‍ നിന്നും ഇതര സംസ്ഥാനങ്ങളില്‍ നിന്നും എത്തിയവര്‍ക്കാണ് കൊവിഡ് ബാധയെന്നതിനാല്‍ രോഗികളുടെ വീട് കേന്ദ്രമാക്കി 100 മീറ്റര്‍ ചുറ്റളവില്‍ വരുന്ന പ്രദേശങ്ങളാണ് കണ്ടെയിന്‍മെന്റ് സോണുകളാക്കുക.
ജില്ലയില്‍ സമ്പര്‍ക്കം വഴിയുള്ള രോഗവ്യാപനം വര്‍ധിച്ചുവരുന്ന സാഹചര്യത്തില്‍ ആളുകള്‍ കൂട്ടം കൂടുന്നത് തടയുന്നതിന് കര്‍ശന നിയന്ത്രണങ്ങള്‍ ഏര്‍പ്പെടുത്താന്‍ ജില്ലാ കളക്ടര്‍ ബന്ധപ്പെട്ടവര്‍ക്ക് നിര്‍ദ്ദേശം നല്‍കി. ഈ സാഹചര്യത്തില്‍ ജൂലായ് 20, 21 തിയ്യതികളില്‍ ക്ഷേത്രങ്ങളിലും പൊതു സ്ഥലങ്ങളിലും കര്‍ക്കടക വാവിനോടനുബന്ധിച്ചുള്ള ബലിതര്‍പ്പണം കൂട്ടം ചേര്‍ന്ന് നടത്തുന്നത് ജില്ലയില്‍ നിരോധിച്ചു. വീടുകളില്‍ വച്ച് ബലിതര്‍പ്പണച്ചടങ്ങ് നടത്താവുന്നതാണെന്നും ജില്ലാ കലക്ടര്‍ അറിയിച്ചു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: