കാഞ്ഞങ്ങാട്: ശസ്ത്രക്രിയക്കായി പ്രവേശിപ്പിച്ചിരുന്ന രോഗിക്ക് കോവിഡ് സ്ഥിരീകരിച്ചതിനെ തുടര്‍ന്ന് ജില്ലാ ആശുപത്രിയിലെ സര്‍ജിക്കല്‍ വാര്‍ഡ് അടച്ചുപൂട്ടി. ഇടുപ്പെല്ലിനുള്ള ശസ്ത്രക്രിയക്കായി ജില്ലാ ആശുപത്രിയില്‍ പ്രവേശിപ്പിക്കപ്പെട്ട കുണിയ സ്വദേശിനിയായ 74കാരിക്കാണ് കോവിഡ് സ്ഥിരീകരിച്ചത്. ഇവരെ കഴിഞ്ഞ ദിവസമാണ് സര്‍ജിക്കല്‍ വാര്‍ഡില്‍ പ്രവേശിപ്പിച്ചത്.
ശസ്ത്രക്രിയക്ക് മുന്നോടിയായുള്ള ആന്റിജന്‍ പരിശോധനയില്‍ കോവിഡ് സ്ഥിരീകരിക്കുകയായിരുന്നു. ഇതോടെ സര്‍ജിക്കല്‍ വാര്‍ഡിലുണ്ടായിരുന്ന 15 രോഗികളെയും 15 കൂട്ടിരിപ്പുകാരെയും നിരീക്ഷണത്തിനായി കാന്‍സര്‍ വാര്‍ഡിലേക്ക് മാറ്റി. ഇവരുമായി സമ്പര്‍ക്കം പുലര്‍ത്തിയ നാല് ആരോഗ്യപ്രവര്‍ത്തകരും ക്വാറന്റൈനിലാണ്.
കുണിയ സ്വദേശിനിക്ക് എവിടെ നിന്നാണ് രോഗം പകര്‍ന്നതെന്ന് വ്യക്തമായിട്ടില്ല. ജില്ലാ ആശുപത്രിയില്‍ ഇതോടെ സന്ദര്‍ശകര്‍ക്ക് കര്‍ശന നിയന്ത്രണമാണ് ഏര്‍പ്പെടുത്തിയിരിക്കുന്നത്. അത്യാവശ്യ ചികിത്സക്ക് മാത്രമേ ആളുകള്‍ ജില്ലാ ആശുപത്രിയുമായി ബന്ധപ്പെടാന്‍ പാടുള്ളൂവെന്ന് അധികൃതര്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: