തിരുവനന്തപുരം: മുഖ്യമന്ത്രിയുടെ ഓഫീസ് കേന്ദ്രീകരിച്ചു നടന്ന സ്വര്ണ്ണക്കടത്തില് പ്രതികളെ സഹായിക്കാന് ബിഎംഎസ് നേതാവ് ഇടപെട്ടു എന്ന വാര്ത്ത ആഘോഷിക്കുകയായിരുന്നു മാധ്യമങ്ങള്. വായില് വരുന്നതെന്തും വിളിച്ചു പറയുന്ന ചാനല്, ഹരിരാജ് എന്ന ബിഎംഎസ് നേതാവ് എന്ന് കണ്ടെത്തി.ബിഎംഎസിന്റെ കസ്റ്റംസ് വിഭാഗം സംഘടനയുടെ സംസ്ഥാന നേതാവായിട്ടാണ് ഹരിരാജിനെ അവതരിപ്പിച്ചത്. മുത്തശ്ശി പത്രം കൊച്ചിയിലും തിരുവനന്തപുരത്തും വീടുകളുള്ള ട്രഡ് യൂണിയന് നേതാവ് എന്നു പറഞ്ഞ് സംശയം നിലനിര്ത്തി.
വാര്ത്ത വന്നതോടെ ബിഎംഎസ് നേതൃത്വത്തിനും ആശയക്കുഴപ്പം ഉണ്ടായി. സംഘടനയക്ക് കസ്റ്റംസ് വിഭാഗം ഇല്ല. എന്നാലും ? സംസ്ഥാന തലത്തില് പോയിട്ട് ജില്ലാ നേതൃത്വത്തില് പോലും ഹരിരാജ് എന്നൊരാള് ചുമതല വഹിക്കുന്നില്ല.എങ്കിലും?
വിശദമായ അന്വേഷണത്തിനു ശേഷം ബിഎംഎസ് സംസ്ഥാന അധ്യക്ഷന് കെ കെ വിജയകുമാര് തന്നെ ഹരിരാജ് എന്നൊരാള് സംഘടനയില് ഇല്ല എന്ന് വ്യക്തമാക്കി പത്രക്കുറിപ്പ് ഇറക്കി. ഉത്തരവാദിത്ത്വം വഹിക്കുന്ന പ്രവര്ത്തകനോ സാധാരണ പ്രവര്ത്തകനോ പ്രത്യക്ഷമായോ പരോക്ഷമായോ ഈ സംഭവങ്ങളുമായി ബന്ധമില്ലന്ന് തീര്ത്തും ബോധ്യമായെന്നും വസ്തു സ്ഥിതികള് അന്വേഷിക്കാതെ ബി.എം.എസ്സിനെ അപകീര്ത്തിപെടുത്താന് ശ്രമിച്ച മാധ്യമങ്ങള്ക്കെതിരെ നിയമ നടപടികള് സ്വീകരിക്കുമെന്നും വിജയകുമാര് പറഞ്ഞു.
എന്നിട്ടും സാമൂഹ്യമാധ്യമങ്ങളില് ബിഎംഎസ് നേതാവ് സ്വപ്നയെ രക്ഷപെടാന് സഹായിച്ചു എന്ന വാര്ത്ത പ്രചരിപ്പിച്ചുകൊണ്ടിരുന്നു. നേതാവിന്റെ എറണാകുളം ഞാറയ്ക്കലുള്ള വീട്ടില് കസ്റ്റംസ് റെയ്ഡ് നടത്തിയെന്നും ഇയാളെ ചോദ്യം ചെയ്യലിന് വിളിപ്പിച്ചെന്നുമൊക്കെവാര്ത്ത പരന്നു
അവസാനം ‘ബിഎംഎസ് നേതാവ് ‘ ഹരിരാജ് നേരിട്ട് പ്രത്യക്ഷപ്പെട്ടു. തിരുവനന്തപുരം കേന്ദ്രീകരിച്ച് പ്രവര്ത്തിക്കുന്ന കാര്ഗോ ഏജന്സിയായ ബോണ് ഫ്രൈറ്റ് എന്ന സ്ഥാപനത്തിന്റെ സിഇഒ ആയ താന് ഒരു തൊഴിലാളി സംഘടനയുടേയും ആളല്ലന്നു വ്യക്തമാക്കി ഹരിരാജ് മാധ്യമങ്ങളെ കണ്ടു. കസ്റ്റംസ് ട്രേഡ് ഫെസിലിറ്റേഷന് കമ്മിറ്റിയംഗം എന്ന നിലയില് പൊതുകാര്യങ്ങള്ക്ക് ഇടപെടാറുണ്ട്. തിരുവനന്തപുരത്ത് കണ്സൈന്മെന്റുകള് വിട്ടുകിട്ടാന് കാലതാമസം എടുത്താല് ഏജന്റുമാര് തന്നോട് പരാതി പറയാറുണ്ടെന്നും ഉദ്യോഗസ്ഥരുമായി ബന്ധപ്പെടാറുണ്ടെന്നും സമ്മതിച്ച ഹരിരാജ് രാഷ്ട്രീയ പാര്ട്ടിയിലും അംഗത്വമില്ലെന്നും വ്യക്തമാക്കി.
സ്വര്ണക്കടത്ത് കേസുമായി ബന്ധപ്പെട്ട് മുഖ്യമന്ത്രിയുടെ ഓഫീസില് നിന്നും ആരുംവിളിച്ചിട്ടില്ലെന്ന് സ്ഥാപിക്കാന് കള്ളം പറഞ്ഞ കസ്റ്റംസ് ജോയിന്റ് കമ്മീഷണര് അനീഷ് രാജിന് പറ്റിയ അബദ്ധമാണ് ഹരിരാജിനെ ‘ബിഎംഎസ് നേതാവ് ‘ ആക്കിയത്. കൊച്ചി വിമാനത്താവളവുമായി ബന്ധപ്പെട്ട് തൊഴിലാളി പ്രശ്നം ഉണ്ടായാല് ബിഎംഎസിന്റെ ഭാഗത്തുനിന്ന് ഇടപട്ടു സംസാരിക്കുന്നത് സംസ്ഥാന സെക്രട്ടറി ആര് രഘു രാജ് ആണ്. മുതിര്ന്ന കസ്റ്റംസ് ഉദ്യോഗസ്ഥര് ഉള്പ്പെടെ പലരേയും വിളിച്ചിട്ടുമുണ്ട്. ഹരിരാജ് എന്നയാള് വിളിച്ച കാര്യം മുതിര്ന്ന ഉദ്യോഗസ്ഥന് പറഞ്ഞതു കേട്ട ജോയിന്റ് കമ്മീഷണര് അനീഷ് രാജ് അത് രഘു രാജ് എന്ന് തെറ്റിധരിച്ചു. കള്ളം പറയുന്നതില് ഒരു ഗുഡ്ബൈയും പറയാതെ 24 മണിക്കൂറും തുറന്നു വെച്ചിരിക്കുന്ന ചാനല് അത് വലിയ വാര്ത്തയുമാക്കി. എന്നാല് കള്ള വാര്ത്തയക്ക് 24 മണിക്കുറിനുള്ളില് ഗുഡ്ബൈ പറയേണ്ടിവന്നു.
