തൊടുപുഴ: നഗരത്തില്‍ റിട്ട. അധ്യാപകന്റെ മൊബൈല്‍ ഫോണ്‍ പിടിച്ച് പറിച്ചോടിയ സംഭവത്തില്‍ യുവാവ് പിടിയില്‍. കരിമണ്ണൂര്‍ പാഴൂര്‍ ചെമ്മലാകുഴി ജോമോന്‍(35) പിടിയിലായത്. ന്യൂമാന്‍ കോളജ് റിട്ട. അധ്യാപകനും മുട്ടം പഞ്ചായത്ത് മുന്‍ പ്രസിഡന്റുമായ പൂവത്തിങ്കല്‍ പ്രൊഫ. കെ.ജെ. കുര്യന്റെ മൊബൈല്‍ ഫോണ്‍ മോഷ്ടിച്ച കേസിലാണ് അറസ്റ്റ്.
ഒപ്പമുണ്ടായിരുന്ന സുഹൃത്ത് രജ്ഞിത്തിനെ പോലീസ് തെരച്ചില്‍ ആരംഭിച്ചു. വ്യാഴാഴ്ച വൈകിട്ട് ടൗണ്‍ ഹാളിന് സമീപത്തെ ടോയ്ലെറ്റിലേക്ക് പോകുന്നതിനിടയില്‍ പ്രതികള്‍ മൊബൈല്‍ ഫോണ്‍ പിടിച്ചു പറിച്ച് സമീപത്തെ കുളിക്കടവിന് സമീപത്തൂടെ ഓടി രക്ഷപെടുകയായിരുന്നു. പോലീസില്‍ അറിയിച്ചതിനെ തുടര്‍ന്ന് ഇവരെത്തി സ്ഥലത്ത് പരിശോധന നടത്തിയെങ്കിലും പ്രതികളെ പിടികൂടാന്‍ കഴിഞ്ഞില്ല.
സിസിടിവി ദൃശ്യങ്ങള്‍ പരിശോധിച്ച് പിടിച്ചുപറി സംഘത്തെ കേന്ദ്രീകരിച്ച് നടത്തിയ അന്വേഷണത്തിലാണ് തൊടുപുഴയില്‍ നിന്ന് ജോമോന്‍ പിടിയിലാകുന്നത്. മൊബൈല്‍ ഫോണും കണ്ടെടുത്തു. തൊടുപുഴ എസ്‌ഐ ബൈജു പി. ബാബുവിന്റെ നേതൃത്വത്തില്‍ എഎസ്‌ഐ ഷംസ്, സിപിഒമാരായ രാജേഷ്, നിസാര്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്. കോടതിയില്‍ ഹാജരാക്കി പ്രതിയെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: