പത്തനാപുരം: റോഡിലെ കുഴിയില്‍ അകപ്പെട്ട് ബൈക്കില്‍ നിന്ന് തെറിച്ച് വീണ യുവാവിന്റെ തലയിലൂടെ കെഎസ്ആര്‍ടിസി ബസ് കയറി ഇറങ്ങി. പുനലൂര്‍ മണിയാര്‍ പരവട്ടം അനന്ദു ഭവനില്‍ ഗോപകുമാര്‍-ബിന്ദു ദമ്പതികളുടെ മകനായ ജി. അനന്ദു (25)വിനാണ് ദാരുണാന്ത്യം സംഭവിച്ചത്. കൊല്ലം-തിരുമംഗലം ദേശീയപാതയില്‍ കുന്നിക്കോട് കുടുംബാരോഗ്യ കേന്ദ്രത്തിന് സമീപം വച്ച് ഇന്നലെ രാത്രി ഏഴരയോടെയായിരുന്നു അപകടം സംഭവിച്ചത്.
കൊല്ലത്തെ ജോലി സ്ഥലത്ത് നിന്നും പുനലൂരിലേക്ക് വരവേ കുന്നിക്കോട്ട് നിന്നും മത്സ്യം വാങ്ങിയ ശേഷം വീട്ടിലേക്ക് പോകുമ്പോഴായിരുന്നു അപകടം. റോഡിലെ കുഴിയില്‍പ്പെട്ട് ഇരുചക്ര വാഹനം തെന്നിമാറിയതിനെ തുടര്‍ന്ന് യുവാവ് റോഡിലേക്ക് തെറിച്ച് വീണു. ഈ സമയം എതിരേ കൊട്ടാരക്കര ഭാഗത്തേക്ക് പോയ കെഎസ്ആര്‍ടിസി ബസിന്റെ പിന്‍ചക്രങ്ങള്‍ യുവാവിന്റെ തലയിലൂടെ കയറിയിറങ്ങി.
ഹെല്‍മെറ്റ് ധരിച്ചിരുന്നെങ്കിലും ഇത് തകര്‍ന്ന നിലയിലാണ്. ആറുമാസം മുമ്പ് വിദേശത്ത് നിന്ന് മടങ്ങിയ അനന്ദു കൊല്ലം പട്ടത്താനത്തെ ഒരു എസി വര്‍ക് ഷോപ്പില്‍ ടെക്നീഷ്യനായി ജോലി ചെയ്ത് വരികയായിരുന്നു. മൃതദേഹം പുനലൂര്‍ താലൂക്ക് ആശുപത്രി മോര്‍ച്ചറിയിലേക്ക് മാറ്റി. സഹോദരി: ആര്യ.
പ്രതികരിക്കാൻ ഇവിടെ എഴുതുക: