കോഴിക്കോട്: കേരളാ പോലീസ്, വിവിധ സര്ക്കാര്, സര്ക്കാരിതര സംവിധാനങ്ങളും പൊതുജനപങ്കാളിത്തത്തോടെ നടപ്പാക്കുന്ന ഹോപ്പ് പദ്ധതി വ്യാപിപ്പിക്കുന്നു. പലവിധ മാനസികാരോഗ്യ പ്രശ്നങ്ങളാലും സാമൂഹിക വെല്ലുവിളികള് മൂലവും പഠനം പാതിവഴിയില് ഉപേക്ഷിക്കുകയോ പത്താം ക്ലാസ് പരീക്ഷയില് തോല്ക്കുകയോ ചെയ്ത കുട്ടികളെ കണ്ടെത്തി പ്രത്യേക പരിശീലനം നല്കി അവര്ക്കു അടിസ്ഥാന വിദ്യാഭ്യാസം ഉറപ്പാക്കുന്നതാണ് പദ്ധതി. നോഡല് ഓഫീസറായ ഐജി പി. വിജയന്റെ നേതൃത്വത്തിലാണ് പദ്ധതി നടപ്പാക്കിയത്.
ഹോപ്പ് പദ്ധതിക്ക് കീഴില് എസ്എസ്എല്സി പരീക്ഷ എഴുതിയ കുട്ടികള് നേടിയ മികച്ച വിജയമാണ് പദ്ധതി വ്യാപിപ്പിക്കാന് കാരണം. ജില്ലയില് പരീക്ഷ എഴുതിയ 62 പേരില് 58 പേരും മികച്ച ഗ്രേഡോടെ വിജയിച്ചു. സംസ്ഥാന തലത്തില് 522 കുട്ടികള് പരീക്ഷ എഴുതിയതില് 465 കുട്ടികള് വിജയിച്ചു. ശ്രദ്ധയും പരിരക്ഷയും ആവിശ്യമായ 2000 ഓളം കുട്ടികളിലേക്ക് പദ്ധതി വ്യാപിപ്പിക്കാനാണ് ലക്ഷ്യമിടുന്നത്. പദ്ധതി കാര്യക്ഷമമായി നടപ്പാക്കുന്നതിന് അഡീഷണല് എസ്പിമാരെ എല്ലാ പോലിസ് ജില്ലകളിലും നോഡല് ഓഫീസര്മാരായി നിയോഗിക്കും. എല്ലാ ജില്ലകളിലും പ്രത്യേകമായി പരിശീലിപ്പിച്ച പരിശീലകരുടെ ഒരു പൂള് തയ്യാറാക്കും. നിലവില് വിജയം കൈവരിച്ച കുട്ടികള്ക്ക് ഉന്നതപഠനത്തിനു സൗകര്യമൊരുക്കുമെന്നും ഐജി പി. വിജയന് അറിയിച്ചു.
ബ്രിന്ഷ, ശശികല, മിനി റോഷന് എന്നീ അദ്ധ്യാപകരുടെ നേതൃത്വത്തിലാണ് ജില്ലയില് വിദ്യാര്ത്ഥികള്ക്ക് പരിശീലനം നല്കിയത്. അക്കാദമികമായി മികവ് പുലര്ത്താന് സഹായിക്കുന്നതോടൊപ്പം വിദ്യാര്ത്ഥികള്ക്ക് ജീവിത നിപുണതകള് പകര്ന്നുനല്കുന്നതും മാനസികാരോഗ്യ പ്രശ്നങ്ങള് പരിഹരിക്കുന്നതിനും ഹോപ്പ് ശാസ്ത്രീയമായ ഇടപെടലുകള് നടത്തുന്നു. ഹോപ്പ് പദ്ധതിക്കായി വിദഗ്ധരുടെ നേതൃത്വത്തില് വികസിപ്പിച്ചെടുത്ത ഹോപ്പ് മാന്വല് അടിസ്ഥാനമാക്കിയാണ് ഓരോ ഹോപ്പ് സെന്ററിലും അധ്യാപകരുടെ നേതൃത്വത്തില് മാസങ്ങള് നീണ്ട പരിശീലനമൊരുക്കിയത്. കുട്ടികള്ക്കുള്ള ക്ലാസ്സുകള്ക്കൊപ്പം രക്ഷിതാക്കള്ക്കും പ്രത്യേക പരിശീലന ക്ലാസുകള് സംഘടിപ്പിച്ചിരുന്നു.
