പത്തനാപുരം: പിടവൂരിലെ സര്‍ക്കാര്‍ഭൂമിയില്‍ തന്നെ താലൂക്കാശുപത്രി നിര്‍മിക്കണമെന്നാവശ്യപ്പെട്ട് യുവമോര്‍ച്ച പ്രവര്‍ത്തകര്‍ പ്രതീകാത്മക ശിലാസ്ഥാപനം സംഘടിപ്പിച്ചു. ബ്ലോക്ക് പഞ്ചായത്ത് ഓഫീസിന് സമീപത്തായാണ് ശില സ്ഥാപിച്ചത്. പുതിയ താലൂക്കാശുപത്രിക്കായി 74 കോടിരൂപ അനുവദിച്ചിട്ടും നിര്‍മാണം ആരംഭിക്കാത്തതില്‍ പ്രതിഷേധിച്ചാണ് യുവമോര്‍ച്ച വേറിട്ട സമരവുമായി എത്തിയത്.
പിടവൂര്‍ ജംഗ്ഷനില്‍ നിന്ന് പ്രകടനമായി എത്തിയ പ്രവര്‍ത്തകരെ ബ്ലോക്ക് ഓഫീസിന്റെ മുന്നില്‍ പോലീസ് തടഞ്ഞു. തുടര്‍ന്ന് ബിജെപി മണ്ഡലം പ്രസിഡന്റ് മഞ്ചള്ളൂര്‍ സതീഷിന്റെ നേതൃത്വത്തില്‍ പ്രതീകാത്മകമായി ശിലയിട്ടു. കെ.ബി. ഗണേഷ് കുമാര്‍ എംഎല്‍എയും സിപിഎമ്മും ചേര്‍ന്ന് ആശുപത്രി വികസനം അട്ടിമറിക്കുകയാണെന്ന് സതീഷ് മഞ്ചള്ളൂര്‍ ആരോപിച്ചു. യുവമോര്‍ച്ച ജില്ലാ വൈസ് പ്രസിഡന്റ് ബബുല്‍ദേവ് പ്രതിഷേധ ധര്‍ണ ഉദ്ഘാടനം ചെയ്തു. മണ്ഡലം പ്രസിഡന്റ് ചേകം രഞ്ജിത്ത് അധ്യക്ഷനായി. ജില്ലാ സെക്രട്ടറി ദീപുരാജ്, കര്‍ഷകമോര്‍ച്ച മണ്ഡലം പ്രസിഡന്റ് ബിജുകുമാര്‍, നിതീഷ് സാംബന്‍ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: