കുണ്ടറ: കേരിക്കുഴി മാപ്പിളപ്പൊയ്ക മേലതില്‍ ഷക്കീര്‍ ബാബുവിനെ കുത്തിക്കൊന്ന കേസിലെ പ്രതികളുടെ വീടുകള്‍ അടിച്ചു തകര്‍ത്തു. ബുധനാഴ്ച രാത്രിയായിരുന്നു സംഭവം. പ്രതികളായ പേരയം വായനശാല ജംഗ്ഷന് സമീപം മാലിയില്‍ പുത്തന്‍വീട്ടില്‍ പ്രജീഷ് , സുഹൃത്ത് പേരയം കല്ലുവിള ബിന്റോ ഭവനില്‍ ബിന്റോ ബാബു എന്നിവരുടെ വീടുകളാണ് ഗുണ്ടാസംഘം തല്ലിത്തകര്‍ത്തത്. പ്രജീഷിന്റെ കുടുംബാംഗങ്ങള്‍ വീട്ടില്‍നിന്ന് മാറിയിരുന്നു.
ബൈക്കുകളിലെത്തിയ സംഘമാണ് നിമിഷങ്ങള്‍ക്കുള്ളില്‍ വീടിന്റെ വാതില്‍പൊളിച്ച് അകത്തുകയറി കണ്ണില്‍ക്കണ്ടതെല്ലാം തല്ലിത്തകര്‍ത്തത്. ബിന്റോയുടെ വീട്ടില്‍ അമ്മ മാത്രമാണുണ്ടായിരുന്നത്. ഇവരെ കത്തികാട്ടി ഭീഷണിപ്പെടുത്തിയശേഷമായിരുന്നു ആക്രമണം. കൊട്ടാരക്കര ഡിവൈഎസ്പിയുടെ നേതൃത്വത്തില്‍ പോലീസ് സംഘം സ്ഥലത്തെത്തി. സമീപത്തെ ക്യാമറാദൃശ്യങ്ങള്‍ പരിശോധിച്ച് പ്രതികളെ കണ്ടെത്തുന്നതിനുള്ള ശ്രമം തുടരുന്നു. പുറത്തുനിന്നെത്തിയവരാണ് അക്രമം നടത്തിയതെന്ന് പോലീസ് പറയുന്നു.
കഴിഞ്ഞ ദിവസം എഴുകോണ്‍, ആറുമുറിക്കട ജംഗ്ഷനുകളില്‍ പ്രതികളെ തെളിവെടുപ്പിനെത്തിച്ചെങ്കിലും ആക്രമിക്കപ്പെടാന്‍ സാധ്യതയുണ്ടെന്ന സ്‌പെഷ്യല്‍ ബ്രാഞ്ചിന്റെ മുന്നറിയിപ്പിനെത്തുടര്‍ന്ന് സംഭവസ്ഥലമായ പേരയത്തെ തെളിവെടുപ്പ് മാറ്റിവയ്‌ക്കുകയായിരുന്നു.
പ്രതികരിക്കാൻ ഇവിടെ എഴുതുക: