തിരുവനന്തപുരം: ഒളിമ്പിക് പ്രകടനം മെച്ചപ്പെടുത്താന് കായിക മന്ത്രാലയം ആരംഭിക്കുന്ന ഖേലോ ഇന്ത്യാ സ്റ്റേറ്റ് സെന്റേഴ്സ് ഓഫ് എക്സലന്സായി ജി.വി രാജ സീനിയര് സെക്കന്ഡറി സ്പോട്സ് സ്കൂളിനെ തെരെഞ്ഞെടുത്തു. തിരുവനന്തപുരം ജില്ലയിലെ മൈലത്താണ് സ്കൂള് പ്രവര്ത്തിക്കുന്നത്.
രാജ്യമെമ്പാടുമുള്ള കായികപ്രതിഭകളെ കണ്ടെത്തി ലോകനിലവാരമുള്ള അടിസ്ഥാന സൗകര്യങ്ങളും പരിശീലനവും നല്കാനാണ് പദ്ധതി. എല്ലാ സംസ്ഥാനങ്ങളിലും കേന്ദ്രഭരണപ്രദേശങ്ങളിലും ഓരോ കേന്ദ്രങ്ങള് വീതം സ്ഥാപിക്കുകയാണ് ലക്ഷ്യം. എട്ടു സംസ്ഥാനങ്ങളില് നിന്നുള്ള സര്ക്കാര് കായികസ്ഥാപനങ്ങളാണ് ആദ്യവിഭാഗത്തില് ഉള്പ്പെടുത്തുന്നത്. കേരളം, കര്ണാടക, ഒഡിഷ, തെലങ്കാന, അരുണാചല്പ്രദേശ്, മണിപ്പൂര്, മിസോറം, നാഗാലാന്ഡ് എന്നീ സംസ്ഥാനങ്ങളിലാണ് കേന്ദ്രങ്ങള്.
നിലവിലുള്ള കായികകേന്ദ്രങ്ങള് സെന്റേഴ്സ് ഓഫ് എക്സലന്സായി ഉയര്ത്തുന്നതിന് കായിക,ശാസ്ത്ര, സാങ്കേതിക സഹായത്തിനായി സര്ക്കാര് ‘വയബിലിറ്റി ഗ്യാപ് ഫണ്ടിങ്’ സൗകര്യം വ്യാപിപ്പിക്കും. കായിക ഉപകരണങ്ങള്, വിദഗ്ധ പരിശീലകര് തുടങ്ങിയവയുടെ അഭാവവും നികത്തും. മറ്റു കായിക ഇനങ്ങള് പരിഗണിക്കുമെങ്കിലും ഒളിമ്പിക്സ് ഇനങ്ങള് കേന്ദ്രീകരിച്ചാകും പ്രധാനമായും സൗകര്യങ്ങള് ഒരുക്കുന്നത്.
താരങ്ങള് ലോക നിലവാരത്തിലേക്ക് ഉയരുന്നുണ്ടോ, ശരിയായ പരിശീലനം ലഭിക്കുന്നുണ്ടോ തുടങ്ങിയ കാര്യങ്ങള് പരിശോധിക്കാനുള്ള ചുമതല സ്പോര്ട്സ് അതോറിറ്റി ഓഫ് ഇന്ത്യയ്ക്കാണ്.
