തിരുവനന്തപുരം: എം.ജി. രാധാകൃഷ്ണന്റെ ഭാര്യ പദ്മജാ രാധാകൃഷ്ണന്റെ സംസ്കാര ചടങ്ങിനായി എത്തിയ മക്കളെ നഗരസഭാ അധികൃതര് തടഞ്ഞു. സുരേഷ് ഗോപി എംപിയുടെ ഇടപെടലില് പദ്മജാ രാധാകൃഷ്ണന്റെ സംസ്കാര ചടങ്ങില് പങ്കുകൊള്ളാനായി.
മരണ വിവരം അറിഞ്ഞ് ദുബായില് നിന്നെത്തിയ മകള് കാര്ത്തികയ്ക്കും, ചെന്നൈയില് നിന്നെത്തിയ മകന് എം.ആര്. രാജാകൃഷ്ണനുമാണ് അന്ത്യകര്മ്മങ്ങളില് പങ്കെടുക്കുന്നതിന് നഗരസഭ വിലക്കാന് ശ്രമിച്ചത്. രണ്ടു പേരും ക്വാറന്റൈനില് കഴിയേണ്ടവരായതിനാല് സംസ്കാര ചടങ്ങില് പങ്കെടുക്കാനാകില്ലെന്നായിരുന്നു നഗരസഭാധികൃതര് അറിയിച്ചത്.
അന്ത്യാഞ്ജലി അര്പ്പിക്കാനെത്തിവരെയെല്ലാം വീട്ടില് നിന്നും പുറത്താക്കി നിറുത്തിയ ശേഷം പിപിഇ കിറ്റ് ധരിച്ച് രാജാകൃഷ്ണനും കാര്ത്തികയും അന്ത്യാഞ്ജലി അര്പ്പിച്ചത്. തുടര്ന്ന് ശാന്തികാവടത്തിലേക്ക് പോകാന് അവര് തയ്യാറായപ്പോഴാണ് എതിര്പ്പുണ്ടായത്. സംഭവം അറിഞ്ഞ സുരേഷ് ഗോപി എംപി അധികൃതരോട് സംസാരിച്ച് വാക്ക് തര്ക്കം ഒഴിവാക്കി മക്കളെ സംസ്കാര ചടങ്ങില് പങ്കെടുക്കാന് സാഹചര്യം ഒരുക്കി നല്കുകയായിരുന്നു.
108 ആംബുലന്സ് എത്തിച്ച് മക്കള് രണ്ടു പേരും അതില് കയറിയാണ് ശാന്തികവാടത്തില് സംസ്കാരത്തിനായി പോയത്. നിലവില് രണ്ടു പേരും വീട്ടിലെ രണ്ടു മുറികളില് ക്വാറന്റൈനില് കഴിയുകയാണ്.
