കുന്നത്തൂര്‍: ശാസ്താംകോട്ട മുതുപിലാക്കാട്ട് പേപ്പട്ടിയുടെ ആക്രമണത്തില്‍ നിരവധി പേര്‍ക്ക് പരിക്കേറ്റു. ഇന്നലെ രാവിലെ അഞ്ചരയോടെ ഭരണിക്കാവ്-കടപുഴ റോഡില്‍ പെട്രോള്‍ പമ്പിന് സമീപം വച്ച് മുതുപിലാക്കാട് പടിഞ്ഞാറ് സനല്‍ ഭവനത്തില്‍ ശശിധരന്‍ പിള്ള (63) യെയാണ് ആദ്യം പട്ടി അക്രമിച്ചത്. റോഡിലൂടെ നടന്ന് വരുന്നതിനിടെയാണ് ആക്രമണം. ശശിധരന്‍ പിള്ളയെ സമീപത്തെ പെട്രോള്‍ പമ്പിലെ ജീവനക്കാരെത്തിയാണ് രക്ഷിച്ചത്.
ഇതിനിടെ അവിടെ നിന്നും രക്ഷപ്പെട്ട നായ സമീപത്തെ സ്വകാര്യ ആശുപത്രി പരിസരത്തെത്തി ഇവിടുത്തെ ജീവനക്കാരന്‍ അനീഷ്(33)നെ അക്രമിച്ചു. ഇവിടെ ഉണ്ടായിരുന്ന രണ്ട് മൂന്ന് രോഗികളെയും നായ അക്രമിക്കാന്‍ ശ്രമിച്ചെങ്കിലും ഇവര്‍ ഓടി മാറിയതിനാല്‍ കിടയേല്‍ക്കാതെ രക്ഷപ്പെട്ടു. ആശുപത്രി പരിസരത്ത് നിന്ന് വീണ്ടും റോഡിലേക്കിറങ്ങിയ നായ റോഡിലൂടെ ബൈക്കില്‍ വരികയായിരുന്ന യുവാക്കളെയും ആക്രമിച്ചു. ബൈക്കിന്റെ നിയന്ത്രണം വിട്ട് യുവാക്കള്‍ റോഡില്‍ വീഴുകയും പുന്നമൂട് സ്വദേശിയായ ജുവല്‍ (20)ന് കടിയേല്‍ക്കുകയും ചെയ്തു.
നിരവധി പേരുടെ നേര്‍ക്കും നായയുടെ അക്രമ ശ്രമം ഉണ്ടായി. തെരുവ് നായ്‌ക്കള്‍ക്കും പേപ്പട്ടിയുടെ കടിയേറ്റതായി സംശയം ഉള്ളതിനാല്‍ നാട്ടുകാരും ആശങ്കയിലാണ്. നായയെ പിന്നീട് നാട്ടുകാര്‍ തല്ലി കൊന്നു. പരിക്കേറ്റവര്‍ ശാസ്താംകോട്ട താലൂക്ക് ആശുപത്രിയില്‍ എത്തി പ്രഥമ ശുശ്രൂഷയ്‌ക്ക് ശേഷം ജില്ലാ ആശുപത്രിയില്‍ ചികിത്സ തേടി.
പ്രതികരിക്കാൻ ഇവിടെ എഴുതുക: