കോട്ടയം: കോട്ടയം പരിപ്പില്നിന്നും യുവാക്കള് തട്ടിക്കൊണ്ടുപോയ പതിനാറ് കാരിയെ രാത്രിയില് ഒളിവില് പാര്പ്പിച്ച വീടിന്റെ വീട്ടുമുറ്റത്ത് ദുരൂഹ സാഹചര്യത്തില് മരിച്ച നിലയില് കണ്ടെത്തി. കുമ്മനം പുത്തന്പറമ്പില് രവി (73)യെയാണ് വീടിന് മുന്നില് മരിച്ച നിലയില് കണ്ടെത്തിയത്.
രവിയുടെ മകന് രാഹുലിന്റെ (32) സുഹൃത്തായ അനന്തുവിന്റെ കാമുകിയായ പെണ്കുട്ടിയെയാണ് സംഘം തട്ടിക്കൊണ്ടു വന്ന് വീട്ടില് പാര്പ്പിച്ചിരുന്നത്. പരിപ്പ് സ്വദേശിയായ പെണ്കുട്ടിയുടെ ബന്ധുക്കള് നല്കിയ പരാതിയുടെ അടിസ്ഥാനത്തില് കുട്ടിയെ കോട്ടയം വെസ്റ്റ്പോലീസ് രാത്രി തന്നെ ഇവിടെ നിന്ന് പെണ്കുട്ടിയെ കണ്ടെത്തി ബന്ധുക്കള്ക്കു കൈമാറി.
എന്നാല്, രാവിലെ രാഹുലിന്റെ ബന്ധുക്കള് എഴുന്നേറ്റു നോക്കിയപ്പോഴാണ് രവിയെ വീട്ടുമുറ്റത്ത് മരിച്ച നിലയില് കണ്ടെത്തിയത്. തുടര്ന്ന് ബന്ധുക്കള് വിവരം കുമരകം പോലീസിനെ അറിയിച്ചു. പോലീസ് സ്ഥലത്ത് എത്തി പരിശോധന ആരംഭിച്ചു. അസ്വഭാവിക മരണത്തിന് കേസെടുത്തിട്ടുണ്ട്. പെണ്കുട്ടിയെ കണ്ടെത്തിയതും, രാഹുലിനെ കസ്റ്റഡിയില് എടുത്തതും മാനദണ്ഡങ്ങള് എല്ലാം പാലിച്ചാണ് എന്നു വെസ്റ്റ് എസ്.എച്ച്.ഒ എം.ജെ അരുണ് അറിയിച്ചു.
