പാവറട്ടിയില്‍ ടൂറിസ്റ്റ് ബസുകള്‍ തീവെച്ച് നശിപ്പിച്ചു;തീയിട്ടതിനു പിന്നില്‍ സാമൂഹിക വിരുദ്ധരെന്ന് നിഗമനം

തൃശൂര്‍: പാവറട്ടി പൂവത്തൂരില്‍ രണ്ടു ടൂറിസ്റ്റ് ബസുകള്‍ കത്തി നശിച്ചു. പെട്രോള്‍ പമ്പിന് സമീപം ഏലാന്ത്ര ട്രാവല്‍സിന്റെ ഗ്രൗണ്ടില്‍ പാര്‍ക്ക് ചെയ്തിരുന്ന ബസുകളാണ് കത്തിച്ചത്. ഇന്നലെ പുലര്‍ച്ചെ 2.30നാണ് സംഭവം. 19 സീറ്റിന്റെ ബസും 49 സീറ്റുള്ള വലിയ ബസുമാണ് കത്തി നശിച്ചത്.  

19 സീറ്റിന്റെ ബസ് പൂര്‍ണമായി കത്തിയിട്ടുണ്ട്. സീറ്റുകള്‍ ഉള്‍പ്പെടെ ബസിന്റെ ഉള്‍വശം മുഴുവനും നശിച്ചു. രണ്ടു വാഹനങ്ങളും തൊട്ടടുത്തായിരുന്നില്ല പാര്‍ക്ക് ചെയ്തിരുന്നത്. ബസുകള്‍ക്ക് സാമൂഹിക വിരുദ്ധര്‍ തീയിട്ടതാണെന്നാണ് പ്രാഥമിക നിഗമനമെന്ന് പോലീസ് അറിയിച്ചു. ഒരു ട്രാവലര്‍ കത്തിക്കാനുള്ള ശ്രമവും നടന്നിട്ടുണ്ട്. പാവറട്ടി വെന്മേനാട് സ്വദേശി ഏലാന്ത്ര ബഷീറിന്റെ ഉടമസ്ഥതയിലുള്ളതാണ് വാഹനങ്ങള്‍. പാര്‍ക്കിങ് സ്ഥലത്ത് ഏലാന്ത്ര ട്രാവല്‍സിന്റെ വാഹനങ്ങള്‍ മാത്രമാണ് പാര്‍ക്ക് ചെയ്തിരുന്നത്.

മൊത്തം 13 വാഹനങ്ങളില്‍ 7 എണ്ണമേ സ്ഥലത്തുണ്ടായിരുന്നുള്ളൂ. ബാക്കി വാഹനങ്ങള്‍ ഓട്ടം പോയിരിക്കുകയായിരുന്നു. ബസുകള്‍ കത്തുന്നത് കണ്ട സമീപവാസി അറിയിച്ചതിനെ തുടര്‍ന്ന് പോലീസ് സംഭവ സമയത്ത് തന്നെ സ്ഥലത്തെത്തി. ഗുരുവായൂരില്‍ നിന്ന് അഗ്‌നിരക്ഷാ സേനയെത്തിയാണ് തീ അണച്ചത്. ഡോഗ് സ്‌ക്വാഡും ഫൊറന്‍സിക് വിദഗ്ധരുമെത്തി പരിശോധന നടത്തി. പാവറട്ടി പോലീസ് കേസെടുത്ത് അന്വേഷണമാരംഭിച്ചു.