ആറ്റിങ്ങല്: ആലംകോട് മത്സ്യമാര്ക്കറ്റില് നിരന്തര ലോക്ഡൗണ് ലംഘനം നടത്തുന്നവര്ക്കെതിരെ നഗരസഭയുടെ കടുത്ത നടപടി. നഗരസഭയുടെ മത്സ്യമാര്ക്കറ്റില് ലോക്ഡൗണ് ലംഘനം നടത്തി കച്ചവടം ചെയ്യാന് ശ്രമിച്ച മത്സ്യവും വാഹനങ്ങളും പിടിച്ചെടുത്തു. വൈകുന്നേരം അഞ്ചരമണിയോടെ ഇതരസംസ്ഥാനങ്ങളില് നിന്ന് മത്സ്യവുമായി എത്തിയ നാലോളം കണ്ടെയിനര് ലോറികളാണ് ഹെല്ത്ത് സ്ക്വാഡിന്റെ പരിശോധനയില് കണ്ടെത്തിയത്.
കൊറോണ ജാഗ്രതാ പ്രവര്ത്തനങ്ങളുടെ ഭാഗമായി രണ്ട് മാസത്തിലേറെയായി നഗരസഭാ മാര്ക്കറ്റ് പൂട്ടിയിട്ടിരിക്കുന്ന സാഹചര്യത്തിലാണ് അനധികൃത മത്സ്യക്കച്ചവടം ചെയ്യാന് ചില മത്സ്യമൊത്ത വ്യാപാരികള് ശ്രമിച്ചത്. അന്യസംസ്ഥാനങ്ങളിലെ റെഡ്സോണുകളില് നിന്നും യാതൊരുവിധ സുരക്ഷാമാനദണ്ഡങ്ങളും പാലിക്കാതെയാണ് വാഹനങ്ങളും ജീവനക്കാരും മാര്ക്കറ്റില് എത്തുന്നത്.
പട്ടണത്തില് പരിശോധന ശക്തമാക്കിയതിനെ തുടര്ന്ന് നഗരസഭാപരിധിക്കപ്പുറത്ത് ചില ജനവാസമില്ലാത്ത കേന്ദ്രങ്ങളില് വച്ച് പ്രാദേശിക രജിസ്ട്രേഷനുള്ള വാഹനങ്ങളിലേക്ക് രാസവസ്തുക്കളടങ്ങിയതും പഴകിയതുമായ മത്സ്യങ്ങള് മാറ്റി കയറ്റുന്ന ഗുരുതരമായ കുറ്റവും നിത്യസംഭവമായി മാറുകയാണ്. കൂടാതെ നിയമവിരുദ്ധമായ മത്സ്യക്കച്ചവടം നഗരത്തില് വന് ഗതാഗതക്കുരുക്കിനും കാരണമാകുന്നു. തുടര്ന്നും സമയക്രമമില്ലാതെ പട്ടണത്തില് ശക്തമായ പരിശോധനയുണ്ടാവുമെന്നും നിയമലംഘനം നടത്തുന്നവര്ക്കെതിരെ കടുത്ത ശിക്ഷാനടപടികള് സ്വീകരിക്കുമെന്നും അറിയിച്ചു.
