തിരുവനന്തപുരം: പ്രവര്ത്തന ശൈലിയില് അടിമുടി മാറ്റം വരുത്തി കേരള പോലീസ്. ഇന്ന് മുതല് നിത്യേനയുള്ള വാഹന പരിശോധനയും പെറ്റി കേസുകളില് അറസ്റ്റ് ചെയ്യുന്നതും പോലീസ് നിര്ത്തിവെയ്ക്കാന് തീരുമാനം. പോലീസില് നടപ്പാക്കേണ്ട പുതിയ മാര്ഗ്ഗ നിര്ദ്ദേശങ്ങള് സംബന്ധിച്ച് ഡിജിപി ലോക്നാഥ് ബെഹ്റ മുഖ്യമന്ത്രിക്ക് കഴിഞ്ഞ ദിവസം റിപ്പോര്ട്ട് നല്കിയിരുന്നു. ഇത് പ്രകാരമുള്ള നിര്ദ്ദേശങ്ങളിലാണ് ഈ മാറ്റം വരുത്തിയിരിക്കുന്നത്.
ഹെഡ്ക്വാര്ട്ടേഴ്സ് എഡിജിപി മനോജ് എബ്രഹാമിന്റെ നേതൃത്വത്തിലുള്ള സംഘമാണ് ഇതു തയാറാക്കിയത്. ഇന്നു മുതല് പുതിയ രീതി നടപ്പാക്കാന് ജില്ലാ പോലീസ് മേധാവികള്ക്കും യൂണിറ്റ് മേധാവികള്ക്കും ഡിജിപി നിര്ദ്ദേശം നല്കി.
ഇതു പ്രക്രാം ദിവസേനയുള്ള വാഹന പരിശോധന താത്കാലികമായി നിര്ത്തിവെയ്ക്കാന് ആവശ്യപ്പെട്ടിട്ടുണ്ട് പെറ്റി കേസുകളില് അറസ്റ്റ് വേണ്ട, ഗുരുതര കേസുകളില് മാത്രം അറസ്റ്റ്. ട്രാഫിക് ഡ്യൂട്ടി തിരക്കേറിയതും പ്രധാനപ്പെട്ടതുമായ സ്ഥലങ്ങളില് മാത്രം മതി. ഗതാഗത കുറ്റത്തിനു പിഴ നേരിട്ട് ഈടാക്കുന്നതിനു പകരം ബാങ്കില് അടയ്ക്കാന് നിര്ദ്ദേശിച്ചിട്ടുണ്ട്.
ഓഫീസുകളിലും യൂണിറ്റുകളിലും ഏഴ് ദിവസം ജോലി ഏഴ് ദിവസം വിശ്രമം എന്ന രീതി നടപ്പാക്കണം.50 ശതമാനം ജീവനക്കാര് മാത്രം ജോലിക്കെത്തിയാല് മതി. ബാക്കി 50 ശതമാനത്തിന് വിശ്രമം ഏര്പ്പെടുത്താനും നിശ്ചയിച്ചിട്ടുണ്ട്. കൂടാതെ പോലീസുകാര് സ്റ്റേഷനില് വന്ന് റിപ്പോര്ട്ട് ചെയ്ത് ഡ്യൂട്ടിക്ക് പോകുന്നതിന് പകരം നേരിട്ടു ഡ്യൂട്ടി സ്ഥലത്ത് എത്തുക. ഡ്യൂട്ടി കഴിഞ്ഞാല് സ്റ്റേഷന് ഹൗസ് ഓഫിസറെ ഫോണില് അറിയിച്ചു മടങ്ങാം. ദിവസവും വൈകുന്നേരം പോലീസുകാരുടെ ഡ്യൂട്ടി നിശ്ചയിച്ചു ഫോണിലൂടെ അറിയിക്കണം.
പരാതിക്കാരുടെ മൊഴി രേഖപ്പെടുത്തണമെങ്കില് വിഡിയോ കോണ്ഫറന്സ് വഴിയോ വിഡിയോ കോള് വഴിയോ രേഖപ്പെടുത്താം. പ്രത്യേകം പോയി എടുക്കണമെന്നില്ല. ജനങ്ങള് സ്റ്റേഷനുകളില് പരാതികളുമായി എത്തുന്നതു നിരുത്സാഹപ്പെടുത്തണം. ഇ മെയില്, വാട്സാപ് ഉപയോഗിക്കാന് നിര്ദ്ദേശിക്കുക. ജനമൈത്രി പോലീസ് വീടുകളില് കയറരുത്. പോലീസുകാരുടെ പരേഡ്, ക്ലാസുകള്, റോള് കോള് എന്നിവ ഒഴിവാക്കണം. ഇനി ഉത്തരവ് ഉണ്ടാകുന്നതു വരെ വെള്ളിയാഴ്ച പരേഡ് വേണ്ട.
അതേസമയം സ്റ്റേഷനുകളില് ഡ്യൂട്ടിയിലുള്ളവര് സംഘം ചേര്ന്നു വിശ്രമിക്കാന് പാടില്ല. ജോലിക്കനുസൃതമായി പോലീസുകാര്ക്കു സുരക്ഷാ ഉപകരണങ്ങള് നല്കണം. വീട്ടില് നിന്നു ഭക്ഷണവും വെള്ളവും കൊണ്ടു വരണം. പുറമേയുള്ള ഭക്ഷണത്തെ ആശ്രയിക്കരുത്.
ആരോഗ്യകരമായ ഭക്ഷണം കഴിക്കാന് പോലീസുകാര്ക്ക് ഉപദേശം നല്കണം. ഒഴിഞ്ഞ വയറുമായി ഡ്യൂട്ടിക്കു വരരുത്. വ്യായാമം, യോഗ എന്നിവ ദിവസവും ചെയ്യാന് ഉപദേശിക്കണം.
കഴുകി വൃത്തിയാക്കിയ യൂണിഫോം ദിവസവും ധരിക്കണം. രോഗമോ പനിയോ മറ്റോ വന്നാല് ഉടന് മേലുദ്യോഗസ്ഥരെ അറിയിക്കണം. പോലീസ് സ്റ്റേഷനുകളിലും യൂണിറ്റുകളിലും വെല്ഫെയര് ഓഫീസറായി ഒരു ഉദ്യോഗസ്ഥനെ ചുമതലപ്പെടുത്തണം.
രോഗ പ്രതിരോധ ശേഷി വര്ധിപ്പിക്കാന് പോലീസുകാര്ക്കു ഹോമിയോ, ആയുര്വേദ മരുന്നുകള് നല്കാം. മേലുദ്യോഗസ്ഥര് ദിവസേനയുള്ള നിര്ദ്ദേശം ഓണ്ലൈന്, വാട്സാപ്, എസ്എംഎസ് എന്നിവ വഴി നല്കണം. സിസിടിവി, ക്യാമറ, ഹെല്പ് ലൈന് എന്നിവയുടെ സേവനം കൂടുതല് പ്രയോജനപ്പെടുത്തണമെന്നും ഈ റിപ്പോര്ട്ടില് പറയുന്നുണ്ട്.
