തിരുവനന്തപുരം: സര്ക്കാര്, എയ്ഡഡ്, പ്രൈവറ്റ് സകൂളുകളിലെ സംസ്ഥാന സിലബസിലെ ഒന്നു മുതല് എട്ടാം ക്ലാസ് വരെയുള്ള മുഴുവന് കുട്ടുകളെയും വിജയിപ്പിക്കും. ഒമ്പതാം ക്ലാസുകാരെ പാദ-അര്ധവാര്ഷിക (ഓണം-ക്രിസ്തുമസ്) പരീക്ഷകളുടെ മാര്ക്കിന്റെ അടിസ്ഥാനത്തില് വിജയിപ്പിക്കുമെന്ന് പൊതുവിദ്യാഭ്യാസ ഡയറക്ടര് പുറത്തിറക്കിയ ഉത്തരവില് വ്യക്തമാക്കുന്നു.
ഒന്പതാം ക്ലാസില് ഇതിനകം പൂര്ത്തീകരിച്ച പരീക്ഷകളുടെ മൂല്യനിര്ണയമുണ്ടാകും. പരീക്ഷ നടത്താന് കഴിയാത്ത ഒന്നാം ഭാഷ പേപ്പര്-2, സാമൂഹ്യശാസ്ത്രം, കലാകായിക പ്രവൃത്തി പരിചയം എന്നിവയുടെ കാര്യത്തില് അര്ദ്ധ വാര്ഷിക പരീക്ഷയ്ക്ക് ലഭിച്ച സ്കോര് പരിഗണിച്ച് ജയിപ്പിക്കും.
അര്ധ വാര്ഷിക പരീക്ഷയെഴുതാത്ത സാഹചര്യമുണ്ടായിട്ടുണ്ടെങ്കില് പാദവാര്ഷിക പരീക്ഷയുടെ സ്കോര് പരിഗണിക്കും. പാദ-അര്ധവാര്ഷിക പരീക്ഷയെഴുതാത്തവര്ക്ക് ആ വിഷയങ്ങളുടെ ചോദ്യപേപ്പര് സ്കൂള് തലത്തില് തയാറാക്കി മൂല്യനിര്ണയം നടത്തും. എല്ലാ ക്ലാസുകളുടെയും പ്രൊമോഷന് ലിസ്റ്റ് മെയ് 20-നകം പ്രസിദ്ധീകരിക്കും. ഇതിനായി ലോക്ഡൗണ് നിയന്ത്രണങ്ങള്ക്കു വിധേയമായി അധ്യാപകരെ ചുമതലപ്പെടുത്തണമെന്നും നിര്ദേശം.
ഒന്നു മുതല് പത്തു വരെയുള്ള ക്ലാസുകാര്ക്ക് ജൂണ് ഒന്നു മുതല് ഓണ്ലൈന് ക്ലാസ്സുകള് തുടങ്ങും. വിക്ടേഴ്സ് ചാനല് വഴിയാണ് ക്ലാസുകള്. മൊബൈല് വഴിയും പങ്കെടുക്കാം. ഈ സംവിധാനങ്ങള് ഇല്ലാത്തിടത്ത് അതിനുള്ള സൗകര്യങ്ങള് അയല്പക്ക പഠന കേന്ദ്രങ്ങള് വഴി ഒരുക്കും. വിവിധ ക്ളാസ്സുകളിലേക്കുള്ള പ്രവേശനം, ഏതുതരത്തിലാകണമെന്ന കാര്യത്തില് തീരുമാനമായില്ല.
ജന്മഭൂമി ഓണ്ലൈന്