തിരുവനന്തപുരം: സംസ്ഥാനത്ത് ഇന്ന് 2 കോവിഡ് പോസിറ്റീവ് കേസുകളാണ് വന്നിട്ടുള്ളത്. രണ്ടും വിദേശത്തുനിന്ന് കഴിഞ്ഞദിവസം വിമാനത്തില് എത്തിയവരാണ്. ഒരാള് കോഴിക്കോട്ടും അടുത്തയാള് കൊച്ചിയിലും ചികിത്സയിലാണ്. ദുബായില്നിന്ന് കോഴിക്കോട്ടെത്തിയ വിമാനത്തിലും അബുദാബിയില്നിന്ന് കൊച്ചിയിലെത്തിയ വിമാനത്തിലും ഉണ്ടായിരുന്ന ഓരോരുത്തര്ക്കാണ് രോഗബാധ സ്ഥിരീകരിച്ചത്. രോഗം സ്ഥിരീകരിച്ച് ഇടുക്കിയില് ചികിത്സയിലായിരുന്ന ഒരാളുടെ പരിശോധനാഫലം നെഗറ്റീവായിട്ടുണ്ട്.
ഇതുവരെ 505 പേര്ക്കാണ് സംസ്ഥാനത്ത് രോഗം സ്ഥിരീകരിച്ചത്. 17 പേരാണ് ഇപ്പോള് ചികിത്സയിലുള്ളത്. 23,930 പേരാണ് ഇപ്പോള് നിരീക്ഷണത്തിലുള്ളത്. 23,596 പേര് വീടുകളിലും 334 പേര് ആശുപത്രികളിലുമാണ്. ഇന്നു മാത്രം 123 പേരെ ആശുപത്രിയില് പ്രവേശിപ്പിച്ചു. ഇതുവരെ 36,648 സാമ്പിളുകളാണ് പരിശോധനയ്ക്ക് അയച്ചത്. 36,002 എണ്ണം രോഗബാധ ഇല്ല എന്നുറപ്പായിട്ടുണ്ട്. സെന്റിനല് സര്വൈലന്സിന്റെ ഭാഗമായി മുന്ഗണനാ വിഭാഗത്തില്പ്പെട്ട 3475 സാമ്പിളുകള് ശേഖരിച്ചതില് 3231 നെഗറ്റീവായിട്ടുണ്ട്.
ഇടപെടലും പ്രതിരോധവും കൂടുതല് ശക്തിപ്പെടുത്തേണ്ടതുണ്ട് എന്നാണ് ഇന്നു വന്ന പരിശോധനാ ഫലം സൂചിപ്പിക്കുന്നതെന്ന് മുഖ്യമന്ത്രി വാര്ത്താസമ്മേളനത്തില് പറഞ്ഞു. വിദേശത്തുനിന്നായാലും മറ്റു സംസ്ഥാനങ്ങളില് നിന്നായാലും ഇങ്ങോട്ടുവരുന്നവരും അവര്ക്കുവേണ്ടിയുള്ള സുരക്ഷാ സംവിധാനങ്ങളും പൂര്ണ ജാഗ്രതയോടെ തുടരണം എന്ന മുന്നറിയിപ്പു കൂടിയാണിത്. അദ്ദേഹം പറഞ്ഞു
