മുംബൈ: ലോക്ഡൗണ്‍ കാരണം പ്രയാസപ്പെടുന്ന മലയാളികള്‍ ഉള്‍പ്പെടെയുള്ളവര്‍ക്ക് സഹായകമാവുകയാണ് പാലഘര്‍ ജില്ലയിലെ വസായിലുള്ള തപസ്യ കലാവേദി ചാരിറ്റബിള്‍ ട്രസ്റ്റ്. വിവിധ സ്ഥലങ്ങളില്‍ കുടുങ്ങിപ്പോവുകയും സാമ്പത്തിക ബുദ്ധിമുട്ട് അനുഭവിക്കുകയും ചെയ്യുന്നവര്‍ക്ക് സഹായമെത്തിക്കുകയാണ് ഇവിടത്തെ തപസ്യ പ്രവര്‍ത്തകര്‍.
മുതിര്‍ന്ന പൗരന്മാര്‍ക്കും വീട്ടില്‍ നിന്ന് പുറത്തിറങ്ങാന്‍ ബുദ്ധിമുട്ടുള്ളവര്‍ക്കും ഗ്യാസ് സിലിന്‍ഡര്‍, മരുന്നുകള്‍, മറ്റ് അവശ്യവസ്തുക്കള്‍, ഭക്ഷണ സാധനകിറ്റ് എന്നിവയും ഇവര്‍ എത്തിച്ചുകൊടുക്കുന്നുണ്ട്. യാത്ര ചെയ്യാന്‍ ബുദ്ധിമുട്ടുള്ള പ്രദേശങ്ങളിലുള്ളവര്‍ക്ക് ഓണ്‍ലൈന്‍ സംവിധാനങ്ങള്‍ ഉള്‍പ്പെടുത്തിയാണ് സാമ്പത്തിക സഹായം കൈമാറിയത്.
ചെറിയ ജോലികള്‍ ചെയ്തു ജീവിക്കുന്ന മലയാളികള്‍ക്കാണ് ഇവരുടെ പ്രവൃത്തി കൂടുതല്‍ സഹായകരമായത്. 11 അവശ്യസാധനങ്ങള്‍ അടങ്ങിയ കിറ്റ് നൂറോളം കുടുംബങ്ങള്‍ക്ക് എത്തിച്ചു നല്‍കിയതായി ട്രസ്റ്റ് ജനറല്‍ സെക്രട്ടറി അരവിന്ദാക്ഷന്‍ അറിയിച്ചു.
പ്രതികരിക്കാൻ ഇവിടെ എഴുതുക: