ഇസ്ലാമാബാദ്: പാക്കിസ്ഥാന്‍ തലസ്ഥാനമായ ഇസ്ലാമാബാദിലേയ്‌ക്ക് അബുദാബിയില്‍ നിന്നുമെത്തിച്ച പ്രവാസികളില്‍ കൊവഡ് പടരുന്നത് ആശങ്ക വര്‍ധിപ്പിക്കുന്നു. എത്തിഹാദ് എയര്‍വേയ്‌സ് വഴി ഏപ്രില്‍ 28ന് ഇസ്ലാമബാദിലെത്തിയ 209 പാക് പൗരന്‍മാരില്‍ 105 പേര്‍ക്കാണ് ഇപ്പോള്‍ കൊവിഡ് സ്ഥിരീകരിച്ചിരിക്കുന്നത്.
യു.എ.ഇ, ഖത്തര്‍, ന്യൂയോര്‍ക്ക്, കൊളംബോ എന്നിവിടങ്ങളില്‍ നിന്നും ഏപ്രില്‍ 28നും 29നും പാകിസ്ഥാനിലെത്തിയ 760 പേരെ പരിശോധനകള്‍ക്ക് വിധേയമാക്കുന്നതിന് തന്നെ 14 ദിവസത്തേക്ക് വീടുകളില്‍ ക്വാറന്റൈന്‍ ചെയ്തിരിക്കുകയാണ്. ഇതേവരെ 21,501 പേര്‍ക്കാണ് പാകിസ്ഥാനില്‍ കൊവിഡ് സ്ഥിരീകരിച്ചിരിക്കുന്നത്. 486 മരണം റിപ്പോര്‍ട്ട് ചെയ്തു. ഇന്ന് ആകെ 560 പുതിയ കൊവിഡ് കേസുകളും 10 മരണങ്ങളുമാണ് പാകിസ്ഥാനില്‍ റിപ്പോര്‍ട്ട് ചെയ്തത്.
ദുബായി, ഷാര്‍ജ, കൊളംബോ എന്നിവിടങ്ങളില്‍ നിന്നും വിമാന മാര്‍ഗം എത്തിച്ച 190 പേരില്‍ കൊവിഡ് കണ്ടെത്തിയതിന് പിന്നാലെയാണ് രാജ്യത്ത് വിദേശത്ത് നിന്നും മടങ്ങിയെത്തിയവരില്‍ വീണ്ടും വൈറസ് സാന്നിദ്ധ്യം കണ്ടെത്തിയിരിക്കുന്നത്. 190 പേരില്‍ 56 പേര്‍ സിന്ധ് പ്രവശ്യയില്‍ നിന്നും 24 പേര്‍ പഞ്ചാബില്‍ നിന്നുമുള്ളവരാണ്. 22 പ്രത്യേക വിമാനങ്ങളിലായി വിവിധ രാജ്യങ്ങളില്‍ നിന്നും പാകിസ്ഥാനിലേക്ക് തിരിച്ചെത്തിയ 3,554 പേരില്‍ കൊവിഡ് സ്ഥിരീകരിച്ച 259 പേര്‍ പഞ്ചാബ് പ്രവിശ്യയിലുള്ളവരാണ്.
മറ്റ് രാജ്യങ്ങളില്‍ കുടുങ്ങിക്കിടക്കുന്ന പാക് പൗരന്‍മാരെ പാകിസ്ഥാന്‍ ഇന്റര്‍നാഷണല്‍ എയര്‍ലൈന്‍സ് ഉള്‍പ്പെടെയുള്ളവയുടെ വിമാനത്തില്‍ നാട്ടിലേക്ക് സര്‍ക്കാര്‍ തിരികെ എത്തിച്ചു കൊണ്ടിരിക്കുകയാണ്.
പ്രതികരിക്കാൻ ഇവിടെ എഴുതുക: