തൃശൂര്‍ : ആര്‍പ്പുവിളികളും ഹര്‍ഷാരവങ്ങളും ഒഴിഞ്ഞ് ഇന്ന് തൃശൂര്‍ പൂരം. കൊറോണ വൈറസിന്റെ സാഹചര്യത്തില്‍ കര്‍ശ്ശന നിയന്ത്രണം നിലനില്‍ക്കുന്നതിനാല്‍ താന്ത്രിക ചടങ്ങുകള്‍ മാത്രമാണ് നടത്തുക. ഞായറഴ്ച നടക്കേണ്ട ഉപചാരം ചൊല്ലിപ്പിരിയലും ഉണ്ടാകില്ല.
ഒരാനപുറത്ത് എഴുന്നെള്ളിപ്പ് നടത്താന്‍ പാറമേക്കാവ് വിഭാഗം കഴിഞ്ഞ ദിവസം അനുമതി തേടിയെങ്കിലും കളക്ടര്‍ തള്ളി. എഴുന്നെള്ളിപ്പും ആനയും മേളയും ഉണ്ടായാല്‍ ആളുകള്‍ കൂട്ടിത്തോടെയെത്തും എന്ന വിലയിരുത്തലിനെ തുടര്‍ന്നാണ് പാറമേക്കാവിന്റെ ആവശ്യം തള്ളിയത്.
തിരുവമ്പാടി – പാറമേക്കാവ് ക്ഷേത്രങ്ങളിലും 8 ഘടക ക്ഷേത്രങ്ങളിലും കൊടിയേറുന്നതോടെയാണ് തൃശൂര്‍ പൂരത്തിന് തുടക്കമാകുന്നത്. കോവിഡ് പ്രതിരോധത്തിന്റെ ഭാഗമായി പൂരം പൂര്‍ണമായി ഒഴിവാക്കണമെന്ന് സര്‍ക്കാര്‍ അറിയിച്ചപ്പോള്‍ എല്ലാ ദേവസ്വങ്ങളും ഇതിനെ അനുകൂലിച്ച് രംഗത്ത് എത്തുകയായിരുന്നു.
എന്നാല്‍ കൊടിയേറ്റം മാത്രം സാധാരണ പോലെ നടത്താന്‍ ദേവസ്വം തീരുമാനിക്കുകയായിരുന്നു. കൊടിയേറ്റ ചടങ്ങില്‍ അഞ്ച് പേര്‍ മാത്രമാണ് പങ്കെടുത്തത്. പൂരം ചടങ്ങ് പോലുമില്ലാതെ പൂര്‍ണമായി ഒഴിവാക്കുന്നത് ചരിത്രത്തില്‍ ഇതാദ്യമായാണ്. ചരിത്രത്തില്‍ ഇന്നേവരെ പൂരം മുടങ്ങിയപ്പോഴെല്ലാം ഒരാനപ്പുറത്ത് ചടങ്ങുകള്‍ നടന്നിരുന്നു. നേരത്തെ ഇന്ത്യ- ചൈന യുദ്ധം നടക്കുന്ന കൊല്ലം ഉള്‍പ്പെടെ നാല് തവണയാണ് പൂരം ചടങ്ങ് മാത്രമാക്കി നടത്തിയത്.
പ്രതികരിക്കാൻ ഇവിടെ എഴുതുക: