തിരുവനന്തപുരം: കേരളം അസാധാരണ സാമ്പത്തിക പ്രതിസന്ധിയിലാണെന്ന് മുഖ്യമന്ത്രി പിണറായി വിജയന് പറഞ്ഞു. വരുമാനത്തില് ഗണ്യമായ ഇടിവുണ്ടാവുകയും അനിവാര്യമായ ചെലവുകള് വര്ധിക്കുകയും ചെയ്തു. ഈ സാഹചര്യത്തില് പ്രതിസന്ധി പരിഹരിക്കുന്നതിനുള്ള മാര്ഗം എന്ന നിലയില് സംസ്ഥാന സര്ക്കാര് ജീവനക്കാരുടെ ആറു ദിവസത്തെ ശമ്പളം വീതം അടുത്ത അഞ്ച് മാസത്തേക്ക് വിതരണം ചെയ്യാതെ മാറ്റിവെയ്ക്കാന് സര്ക്കാര് തീരുമാനിച്ചിരുന്നു. ഇതിന് നിയമ പ്രാബല്യം പോരെന്ന് ഹൈക്കോടതി ചൂണ്ടിക്കാണിച്ച സാഹചര്യത്തില് സര്ക്കാര് ഉത്തരവിന് നിയമ പ്രാബല്യം നല്കുന്നതിന് ഹൈക്കോടതി ഉത്തരവിന് അനുസൃതമായി ഓര്ഡിനന്സ് പുറപ്പെടുവിക്കാന് ഗവര്ണറോട് ശുപാര്ശ ചെയ്യാന് മന്ത്രിസഭായോഗം തീരുമാനിച്ചതായി മുഖ്യമന്ത്രി പറഞ്ഞു.
മന്ത്രിമാര്, എംഎല്എമാര് എന്നിവരുടെ അലവന്സ് അടക്കമുള്ള പ്രതിമാസ മൊത്ത ശമ്പളം/ ഹോണറേറിയം 30 ശതമാനം ഒരു വര്ഷത്തേക്ക് കുറവു ചെയ്യാന് 2020ലെ ശമ്പളവും ബത്തകളും നല്കല് ഭേദഗതി ഓര്ഡിനന്സ് വിളംബരം ചെയ്യാന് ഗവര്ണര്ക്ക് ശുപാര്ശ ചെയ്യാന് തീരുമാനിച്ചു. എംഎല്എമാര്ക്ക് പ്രതിമാസം ലഭിക്കുന്ന അമിനിറ്റീസ് തുകയിലും 30 ശതമാനം കുറവ് വരുത്തും.
കോവിഡ് 19ന്റെ സാഹചര്യത്തില് വാര്ഡ് വിഭജന ജോലികള് പൂര്ത്തിയാക്കാന് തടസ്സങ്ങളുള്ള സാഹചര്യത്തില് പഞ്ചായത്തുകളിലെയും നഗരസഭകളിലെയും അംഗങ്ങളുടെ എണ്ണം ഓരോന്നു വീതം വര്ധിപ്പിക്കാന് നേരത്തെ എടുത്ത തീരുമാനത്തില് മാറ്റം വരുത്തുകയാണ്. നിലവിലെ തദ്ദേശസ്വയംഭരണ സ്ഥാപന മണ്ഡലങ്ങളുടെ അടിസ്ഥാനത്തില് തന്നെ തെരഞ്ഞെടുപ്പ് നടത്താനാണ് ഉദ്ദേശിക്കുന്നത്. ഇതിന് നിയമപ്രാബല്യം നല്കുന്നതിന് ഓര്ഡിനന്സ് പുറപ്പെടുവിക്കുന്നതിന് ഗവര്ണറോട് ശുപാര്ശ ചെയ്യാന് തീരുമാനിച്ചു. കേരള പഞ്ചായത്ത് രാജ് ആക്ടിലും കേരള മുനിസിപ്പാലിറ്റി ആക്ടിലുമാണ് ഭേദഗതി വരുത്തുന്നത്
