തിരുവനന്തപുരം: ലോക് ഡൗണിനിടെ മാസ്ക് ധരിച്ച് പട്ടാപ്പകല് കാര് കുത്തിത്തുറന്ന് ഡോക്ടറുടെ സര്ട്ടിഫിക്കറ്റുകള് മോഷ്ടിച്ചു. തിരുവനന്തപുരം ജനറല് ആശുപത്രിക്ക് മുന്നില് പാര്ക്കുചെയ്തിരുന്ന വള്ളക്കടവ് സ്വദേശി ഡോ. ഷിബിന് ഷായുടെ സര്ട്ടിഫിക്കറ്റുകള് അടങ്ങിയ ബാഗാണ് മോഷ്ട്ടിച്ചത്. മോഷ്ടാവിനെ സിസിടിവിയില് പതിഞ്ഞെങ്കിലും മാസ്ക് ധരിച്ചതിനാല് മുഖം വ്യക്തമല്ല.
ജനറലാശുപത്രിക്ക് സമീപമുള്ള മെഡിക്കല് കൗണ്സില് ഓഫീസില് രജിസ്ട്രേഷന് വന്നതാണ് വള്ളക്കടവ് സ്വദേശിയായ ഡോക്ടര്. ഓഫീസിനു മുന്നിലെ റോഡില് പാര്ക്കുചെയ്ത കാറിലായിരുന്നു ഒറിജിനല് സര്ട്ടിഫിക്കറ്റ് അടങ്ങിയ ബാഗ്. ആവശ്യങ്ങള് പൂര്ത്തിയാക്കി തിരികെയെത്തിയപ്പോഴാണ് മോഷണവിവരം ഷിബിന് അറിഞ്ഞത്.
