കാക്കനാട്: പ്രളയ ദുരിതാശ്വാസ ഫണ്ടില്‍ നിന്നും കളക്ട്രേറ്റ് ജീവനക്കാരുമായി ചേര്‍ന്ന് അരക്കോടിയില്‍ അധികം തുക വെട്ടിച്ചതായി റിപ്പോര്‍ട്ട്. പ്രളയ ഫണ്ടില്‍ തട്ടിപ്പ് നടത്തിയ പ്രതികള്‍ ചേര്‍ന്ന് 20 ലക്ഷം രൂപകൂടി തട്ടിയെടുത്തതായി അന്വേഷണ സംഘം കണ്ടെത്തിയിരുന്നു. ഇതോടെയാണ് 50 ലക്ഷത്തിന് മുകളിലായി പ്രതികള്‍ ചേര്‍ന്ന് പ്രളയ ഫണ്ടില്‍ നിന്നും തുക ഈടാക്കിയതായി കണ്ടെത്തിയിട്ടുള്ളത്.
കേസില്‍ റിമാന്‍ഡില്‍ കഴിയുന്ന കളക്ടറേറ്റ് സെക്ഷന്‍ ക്ലര്‍ക്കായിരുന്ന ഒന്നാം പ്രതി വിഷ്ണുപ്രസാദിന്റെ നേതൃത്വത്തിലാണ് ഈ തട്ടിപ്പ് നടത്തിയിരുന്നത്. പ്രളയ ദുരിത ബാധിതര്‍ക്ക് ആദ്യഘട്ടം അടിയന്തിര സഹായമായി 10000 രൂപയാണ് സര്‍ക്കാര്‍ നല്‍കിയത്. എന്നാല്‍ പണം കൈപ്പറ്റിയ ഗുണഭോകതാക്കളെ ഫോണ്‍ വിളിച്ച് അവര്‍ക്ക് കൂടുതല്‍ തുകയ്‌ക്ക് അര്‍ഹതയുണ്ടെന്നും അതിനാല്‍ ലഭിച്ച പണം തിരിച്ചടയ്‌ക്കണമെന്നും തട്ടിപ്പ് സംഘം ആവശ്യപ്പെടുകയായിരുന്നു. ഇത്തരത്തില്‍ ഗുണഭോക്താക്കള്‍ പണവുമായി എത്തിയിരുന്നത് വിഷ്ണുപ്രസാദിന്റെ അരികിലാണ്. ഇയാള്‍ പണം കൈപ്പറ്റിയശേഷം വ്യാജ രസീത് തയ്യാറാക്കി നല്‍കി ഇവരെ തിരിച്ചയയ്‌ക്കും. ഇത്തരത്തില്‍ 20 ലക്ഷത്തോളം രൂപ വിഷ്ണു ഗുണഭോക്താക്കളില്‍ നിന്നും തിരിച്ചുപിടിച്ച് കൈവശപ്പെടുത്തിയിട്ടുണ്ട്.
കളക്ടറേറ്റിലെ രേഖകള്‍ പരിശോധിച്ചപ്പോഴാണ് തട്ടിപ്പിന്റെ കൂടുതല്‍ വിവരങ്ങള്‍ പുറത്തുവന്നത്. അതേസമയം, ലോക്ഡൗണിനെ തുടര്‍ന്നുണ്ടായ പ്രത്യേക സാഹചര്യത്തില്‍ കൂടുതല്‍ പേരെ ചോദ്യം ചെയ്യാനോ ആരുടെയൊക്കെ അക്കൗണ്ടുകളിലേക്കാണ് പണം പോയതെന്നോ കണ്ടെത്താന്‍ സാധിക്കാത്ത സ്ഥിതിയാണുള്ളത്. നേരത്തെ 27.73 ലക്ഷം രൂപയുടെ തട്ടിപ്പിന്റെ വിവരങ്ങള്‍ ക്രൈംബ്രാഞ്ച് മൂവാറ്റുപുഴ വിജിലന്‍സ് കോടതിയില്‍ കൈമാറിയിയിട്ടുണ്ട്.
ലോക്ഡൗണ്‍ കഴിയുന്നതോടെ പ്രതികള്‍ക്കെതിരേ അന്വേഷണം ഊര്‍ജിതമാക്കാനാണ് ക്രൈംബ്രാഞ്ചിന്റെ തീരുമാനം. പ്രളയഫണ്ട് തിരിമറി കേസില്‍ വിഷ്ണുവും കൂട്ടുകാരനായ രണ്ടാം പ്രതി ബി. മഹേഷും ഉള്‍പ്പെടെ ഏഴ് പേരെയാണ് ഇതുവരെ ക്രൈംബ്രാഞ്ച് അന്വേഷണ സംഘം പ്രതി ചേര്‍ത്തിരിക്കുന്നത്.
സിപിഎം തൃക്കാക്കര ഈസ്റ്റ് മുന്‍ ലോക്കല്‍ കമ്മിറ്റി അംഗം എം.എം. അന്‍വര്‍, ഭാര്യ മുന്‍ അയ്യനാട് സഹകരണ ബാങ്ക് ഡയറക്ടര്‍ കൗലത്ത്, രണ്ടാം പ്രതി മഹേഷിന്റെ ഭാര്യ നീതു, സിപിഎം തൃക്കാക്കര ഈസ്റ്റ് മുന്‍ ലോക്കല്‍ കമ്മിറ്റി അംഗം എന്‍.എന്‍. നിഥിന്‍, ഭാര്യ ഷിന്റു എന്നിവരാണ് മൂന്ന് മുതല്‍ ഏഴ് വരെ പ്രതികള്‍. ഇതില്‍ അന്‍വര്‍, കൗലത്ത്, നീതു എന്നിവരെ അറസ്റ്റ് ചെയ്യാന്‍ കഴിഞ്ഞിട്ടില്ല. ഇവരുടെ മുന്‍കൂര്‍ ജാമ്യാപേക്ഷ ഹൈക്കോടതിയുടെ പരിഗണനയിലാണ്.
പ്രതികരിക്കാൻ ഇവിടെ എഴുതുക: