പത്തനംത്തിട്ട: പത്തൊമ്പാമത്തെ പരിശോധനാ ഫലവും പോസിറ്റീവായതോടെ 42 ദിവസമായിട്ടും കൊവിഡ് രോഗത്തില് നിന്ന് മുക്തി നേടാതെ ചെറുകുളഞ്ഞി സ്വദേശിയായ വീട്ടമ്മ.
ഇറ്റലി കുടുംബത്തില് നിന്നു സമ്പര്ക്കത്തിലൂടെയാണ് ഇവര്ക്ക് കൊവിഡ് പകര്ന്നത്. ഇവര്ക്കൊപ്പം രോഗം ബാധിച്ച മകള് രോഗം ഭേദമായി നാല് ദിവസം മുന്പ് വീട്ടിലേക്കു മടങ്ങിയിരുന്നു. ഇവര്ക്കു രോഗം പിടിപെടാന് കാരണമായ ഇറ്റലി കുടുംബവും ഇവരില് നിന്നു പകര്ന്ന മറ്റെല്ലാവരും രോഗം ഭേദമായി വീട്ടില് തിരിച്ചെത്തി.
വീട്ടമ്മയുടെ പരിശോധന പുനഃക്രമീകരിക്കുന്നതിനെക്കുറിച്ചാണ് ഇപ്പോള് ആലോചിക്കുന്നത്. ആവശ്യമെങ്കില് സംസ്ഥാന മെഡിക്കല് ബോര്ഡില് നിന്ന് ഉപദേശം സ്വീകരിക്കും. കാര്യമായ ആരോഗ്യ പ്രശ്നങ്ങളില്ലാത്ത ഇവര്ക്കു രോഗം ഭേദമാകാത്തതു ആരോഗ്യവകുപ്പിനെ ആശയക്കുഴപ്പത്തിലാക്കിയിരിക്കുകയാണ്.
രോഗിക്ക് ഇപ്പോള് കാര്യമായ രോഗ ലക്ഷണങ്ങളില്ല. ഇവരില് നിന്ന് രോഗം പകരാനും സാധ്യതയില്ല. മരുന്നിന്റെ പുതിയ ഡോസ് അവര്ക്ക് വീണ്ടും നല്കി. ഇതിന്റെ ഫലം കൂടി വരാന് കാത്തിരിക്കുകയാണ് ഡോക്ടര്മാര്. ഇതിലും ഫലം നെഗറ്റീവായില്ലെങ്കില് മെഡിക്കല് കോളജ് ആശുപത്രിയിലേക്കു മാറ്റാനാണ് ആലോചിക്കുന്നത്. ഇവരുടെ ചികിത്സ സംബന്ധിച്ച് കഴിഞ്ഞ ദിവസം ജില്ലാ ആരോഗ്യ ബോര്ഡ് യോഗം ചേര്ന്നു വിശദമായ ചര്ച്ച നടത്തിയിരുന്നു.
