ഇടുക്കി: സംസ്ഥാനത്ത് കൊറോണ (കൊവിഡ് 19) വൈറസ് ബാധയെ തുടര്‍ന്ന് കടുത്ത നിയന്ത്രണങ്ങള്‍ ഏര്‍പ്പെടുത്തിയിട്ടും കൂസാതെ പുറത്തിറങ്ങി നടന്ന മൂന്നാറുകാര്‍ക്ക് തിരിച്ചടിയായി ജില്ലാ ഭരണകൂടത്തിന്റെ കര്‍ശന നടപടി. മൂന്നാറില്‍ ഇന്ന് ഉച്ചയ്‌ക്ക് രണ്ട് മണി മുതല്‍ സമ്പൂര്‍ണ ലോക്ക്ഡൗണ്‍ ഏര്‍പ്പെടുത്തും. രോഗ ബാധ വ്യാപകമാകാതിരിക്കാന്‍ നടപ്പാക്കിയ നിയന്ത്രണങ്ങള്‍ ലംഘിച്ച് ആളുകള്‍ പുറത്തിറങ്ങുന്നത് പതിവായതോടെയാണ് നടപടി.
അവശ്യ സാധനങ്ങളെല്ലാം ഉച്ചയ്‌ക്ക് രണ്ട് മണിയ്‌ക്ക് മുന്‍പ് സാമൂഹ്യ അകലം പാലിച്ച് വാങ്ങണം. അതിന് ശേഷം ഏപ്രില്‍ 16 വരെ മെഡിക്കല്‍ സ്റ്റോറും പെട്രോള്‍ പമ്പുകളും ഒഴിച്ചുള്ള വ്യാപാര സ്ഥാപനങ്ങളൊന്നും തുറക്കില്ല. നിര്‍ദ്ദേശം ലംഘിച്ച് കുട്ടികള്‍ പുറത്തിറങ്ങിയാല്‍ മാതാപിതാക്കള്‍ക്ക് എതിരെ കേസെടുക്കുമെന്നും ജില്ലാ ഭരണകൂടം അറിയിച്ചിട്ടുണ്ട്.
കുട്ടികള്‍ മാത്രമല്ല ലോക്ഡൗണില്‍ മുതിര്‍ന്ന പൗരന്മാര്‍ പുറത്തിറങ്ങിയാലും വീട്ടുകാര്‍ക്ക് എതിരെ കേസെടുക്കും. പോലീസ് ഡ്രോണ്‍ ഉപയോഗിച്ച് നടത്തിയ പരിശോധനയില്‍ ഓരോ വഴികളിലും മണിക്കൂറില്‍ ശരാശരി 150 പേര്‍ വരെ പുറത്തിറങ്ങുന്നുവെന്ന് കണ്ടെത്തിയിരുന്നു. ഇതേത്തുടര്‍ന്ന് പോലീസ്, റവന്യൂ, വ്യാപാരികള്‍ എന്നിവരുമായി കൂടിയാലോചിച്ചാണ് ജില്ലഭരണകൂടം സമ്പൂര്‍ണ അടച്ചിടല്‍ പ്രഖ്യാപിച്ചത്.
തോട്ടം തൊഴിലാളികള്‍ക്ക് അവശ്യസാധനങ്ങള്‍ എസ്റ്റേറ്റുകളിലെ കടകളില്‍ നിന്ന് വാങ്ങാന്‍ ക്രമീകരണം ഏര്‍പ്പെടുത്തി. പച്ചക്കറി പോലെ കേടുവരാന്‍ സാധ്യതയുള്ള ഭക്ഷ്യവസ്തുക്കള്‍ രണ്ട് മണിക്ക് മുന്‍പ് ടൗണിലെ മാര്‍ക്കറ്റില്‍ നിന്ന് ആവശ്യമുള്ള കടകളിലേക്ക് കൊണ്ടുപോകണം. ഇറച്ചിക്കോഴികള്‍ നിലവിലുള്ള സ്റ്റോക്ക് തീരുന്നത് വരെ മൂന്നാര്‍ പഞ്ചായത്ത് സെക്രട്ടറിയുടെ നിര്‍ദ്ദേശാനുസരണം വിറ്റഴിക്കും.
നിരോധനാജ്ഞ ഏര്‍പ്പെടുത്തി രണ്ടാഴ്ചയായിട്ടും മൂന്നാറില്‍ തിരക്കിന് കുറവില്ലായിരുന്നു. പോലീസ് പലതവണ മുന്നറിയിപ്പ് നല്‍കി. പക്ഷേ എല്ലാവരും പറയുന്നത് ഒരേകാര്യം. അവശ്യസാധനങ്ങള്‍ വാങ്ങണം. പുറത്തിറങ്ങുന്ന എല്ലാവരെയും പരിശോധിക്കുക ബുദ്ധിമുട്ടായതോടെയാണ് ലോക്ഡൗണ്‍ പ്രഖ്യാപിച്ചത്.
പ്രതികരിക്കാൻ ഇവിടെ എഴുതുക: