തിരുവനന്തപുരം: റിട്ട. എ.എസ്.ഐ കൊവിഡ് ബാധിച്ച് മരിച്ചതിനെ തുടർന്ന് അതീവ ജാഗ്രതയിൽ തുടരുന്ന പോത്തൻകോട്ട് റാപ്പിഡ് ടെസ്റ്റ് ഫലങ്ങൾ നെഗറ്റീവായതോടെ നിയന്ത്രണങ്ങളിൽ നേരിയ അയവ് വരുത്തി. അവശ്യസാധനങ്ങൾ വിൽക്കുന്ന കടകളുടെ പ്രവർത്തനം രാവിലെ 7 മുതൽ വൈകുന്നേരം 5 വരെയാക്കി. നിലവിൽ ഏഴ് മുതൽ ഒൻപത് വരെയായിരുന്നു സമയം.
സമയം നീട്ടിയെങ്കിലും കടകൾക്ക് മുന്നിൽ കൂട്ടം കൂടാനോ സാമൂഹ്യ അകലം അവഗണിക്കാനോ പാടില്ല. ഇക്കാര്യം കടയുടമകൾ ശ്രദ്ധിക്കണമെന്ന് വ്യാപാരികളോട് ആരോഗ്യ വകുപ്പും പൊലീസും അഭ്യർത്ഥിച്ചിട്ടുണ്ട്. ഒരുസമയം കടയിൽ ഒന്നലധികം ആളുകളെ പ്രവേശിപ്പിക്കരുതെന്നും കടയുടമകളും സാധനങ്ങൾ വാങ്ങാനെത്തുന്നവരും ഒരു മീറ്റർ അകലത്തിൽ നിന്ന് വേണം ഇടപാടുകൾ നടത്താനെന്നും ആരോഗ്യ പ്രവർത്തകർ നിർദേശിച്ചു.
എല്ലാ ബാങ്ക് ശാഖകളും ഏപ്രിൽ 6 മുതൽ തുറക്കും, 10 മുതൽ രണ്ട് വരെയായിരിക്കും പ്രവർത്തനം. വീടിന് പുറത്തിറങ്ങുന്നവർ മാസ്കോ തൂവാലയോ ഉപയോഗിച്ച് വായും മൂക്കും മറയ്‌ക്കണം.കടകളിൽ നിന്ന് വീട്ടിലെത്തിയാൽ ഉടൻ സോപ്പും വെള്ളമോ സാനിറ്റൈസറോ ഉപയോഗിച്ച് കൈകൾ അണുവിമുക്തമാക്കണം.
ലഭ്യമായ ഫലങ്ങളെല്ലാം നെഗറ്റീവാണെങ്കിലും രോഗ ഭീതി ഭയന്ന് സ്ഥലത്ത് കരുതൽ നടപടികളുടെ ഭാഗമായ വാഹനപരിശോധനയും നിരീക്ഷണവും തുടരുമെന്ന് പോലീസ് അറിയിച്ചു. വാഹനങ്ങളിൽ അനാവശ്യമായി കറങ്ങാനോ കാഴ്ചകൾ കാണാനായി കൂട്ടം കൂടാനോ ആരെയും അനുവദിക്കില്ല. ഡ്രോൺ നിരീക്ഷണവും നടത്തുമെന്ന് പോലീസ് വ്യക്തമാക്കി.
പ്രതികരിക്കാൻ ഇവിടെ എഴുതുക: