തിരുവനന്തപുരം: പ്രതിരോധ പ്രവര്ത്തനങ്ങളുടെ ഭാഗമായി സേവാഭാരതി നടത്തുന്ന സേവന പ്രവര്ത്തനങ്ങളെ തടസ്സപ്പെടുത്തുകയും നിയന്ത്രിക്കുകയും ചെയ്യുന്ന സര്ക്കാര് നടപടികള്ക്കെതിരെ സേവാഭാരതി സംസ്ഥാന പ്രസിഡന്റ് ഡോ. കെ. പ്രസന്നമൂര്ത്തി ഗവര്ണര്ക്ക് പരാതി നല്കി. കേരളത്തിലെ എല്ലാ ജില്ലകളിലും യുവജനങ്ങളെ സന്നദ്ധരാക്കുകയും സര്ക്കാരിന്റെ പ്രവര്ത്തനങ്ങളോട് സഹകരിക്കണമെന്ന് പ്രവര്ത്തകര്ക്ക് സേവാഭാരതി സംസ്ഥാന തലത്തില് നിര്ദ്ദേശം നല്കുകയും ചെയ്തിരുന്നു. ഇതുപ്രകാരം ഓരോ ജില്ലയിലും സേവാഭാരതി കൈക്കൊണ്ട മുന്നൊരുക്കങ്ങള് അതത് ജില്ലാ കളക്ടര്മാരെ സന്ദര്ശിച്ച് നേരിട്ട് ബോധ്യപ്പെടുത്തിയിട്ടുള്ളതുമാണ്.
എന്നാല്, സര്ക്കാര് സംവിധാനങ്ങളില് പ്രവര്ത്തകരെ സഹകരിപ്പിക്കാതിരിക്കുകയും സേവാഭാരതിയുടെ സ്വതന്ത്രമായ പ്രവര്ത്തനങ്ങളെ തടസ്സപ്പെടുത്തുകയുമാണ് സര്ക്കാര് ചെയ്തുവരുന്നത്, പരാതിയില് ചൂണ്ടിക്കാട്ടി. സേവാഭാരതിക്ക് സ്വതന്ത്രമായ പ്രവര്ത്തന സ്വാതന്ത്ര്യം അനുവദിക്കണമെന്ന് ആവശ്യപ്പെട്ടാണ് ഗവര്ണര്ക്ക് പരാതി സമര്പ്പിച്ചത്. 2018-2019 വര്ഷങ്ങളിലെ പ്രകൃതി ദുരന്തങ്ങളില് സേവാഭാരതി നടത്തിയ സേവനപ്രവര്ത്തനങ്ങള് ലോകം മുഴുവന് കണ്ടിട്ടുള്ളതാണ്.
സര്ക്കാരിനെക്കാള് വളരെ വേഗത്തില് നടത്തിയ പുനരധിവാസ പ്രവര്ത്തനങ്ങള് പൊതുസമൂഹവും അംഗീകരിച്ചിട്ടുള്ളതാണ്. കക്ഷി രാഷ്ട്രീയ മത വിവേചനങ്ങള്ക്കതീതമായി സര്ക്കാരുകളുടെ സഹായമില്ലാതെ സേവാഭാരതി സ്വതന്ത്രമായി നടത്തിവരുന്ന സേവനപ്രവര്ത്തനങ്ങള് ജനങ്ങള് നേരിട്ട് അനുഭവിച്ചറിയുന്നതാണ്. ഇതിലെല്ലാമുള്ള ജാള്യത മറയ്ക്കാന് വേണ്ടിയാണ് കൊറോണ പ്രതിരോധ പ്രവര്ത്തനങ്ങളില് നിന്ന് സേവാഭാരതിയെ മാറ്റിനിര്ത്താന് സര്ക്കാര് ശ്രമിക്കുന്നതെന്ന് പരാതിയില് പറയുന്നു.
രാഷ്ട്രീയ താല്പ്പര്യമല്ല മറിച്ച് രാജ്യതാല്പ്പര്യവും ജനതാല്പ്പര്യവുമാണ് സേവാഭാരതിക്ക് വലുത്. നിയമവിധേയമായി പ്രവര്ത്തിക്കുന്ന സേവാഭാരതിയെ സ്വതന്ത്രമായി പ്രവര്ത്തിക്കുന്നതിന് അനുവദിക്കണമെന്ന് ബന്ധപ്പെട്ടവര്ക്ക് നിര്ദേശം നല്കണമെന്നാണ് പരാതിയില് ഗവര്ണറോട് അഭ്യര്ഥിച്ചിട്ടുള്ളത്.
