കൊച്ചി: സിനിമാ മേഖലയില്‍ പ്രവര്‍ത്തിക്കുന്ന ദിവസവേതനക്കാരായ തൊഴിലാളികളെ സഹായിക്കാന്‍ മുന്നിട്ടിറങ്ങി മോഹന്‍ലാല്‍. ഇതിനായി നല്ലൊരു തുകയാണ് താരം മലയാള സിനിമ പ്രവര്‍ത്തകരുടെ സംഘടനയായ ഫെഫ്കയ്‌ക്ക് കൈമാറുന്നത്. തൊഴിലാളികളെ സഹായിക്കാനായുള്ള പദ്ധതിയുടെ ഒരുക്കങ്ങള്‍ അവസാന ഘട്ടത്തിലാണെന്നും അധികം വൈകാതെ തന്നെ പ്രാവര്‍ത്തികമാക്കുമെന്നും ഫെഫ്ക ഭാരവാഹികള്‍ പറഞ്ഞു.
കൊറോണ ഉയര്‍ത്തുന്ന ഭീഷണിയില്‍ ഷൂട്ടിംഗ് കുറച്ചുദിവസത്തേക്കെങ്കിലും മുടങ്ങുമെന്ന് ഉറപ്പായിരുന്നു. ഇത് സാധാരണക്കാരായ തൊഴിലാളികളുടെ ജീവിതത്തെ ബാധിക്കുമെന്നു കണ്ട ഫെഫ്ക അധികൃതര്‍ അവരെ സാഹായിക്കണമെന്ന് നിശ്ചയിച്ചു. പ്രവര്‍ത്തനത്തിന്റെ പ്രാരംഭം എന്നോണം ഇതിനായി ഒരു വാട്ട്‌സ് ആപ്പ് ഗ്രൂപ്പും ആരംഭിച്ചു. എന്നാല്‍ ഇതിനെല്ലാം മുന്നേതന്നെ ഇവരെ സഹായിക്കാനായി എന്തു ചെയ്യാനാകും എന്ന് മോഹന്‍ലാല്‍ ഫെഫ്കയിലുള്ളവരോട് ചോദിക്കുകയും ഇതിനായി അദ്ദേഹം നല്ലൊരു തുക നല്‍കാന്‍ തയ്യാറാണെന്ന് അറിയിക്കുകയും ചെയ്തു.
തെലുങ്ക് സിനിമാ മേഖലയിലെ തൊഴിലാളികളെ സഹായിക്കാനായി സൂപ്പര്‍സ്റ്റാര്‍ അല്ലൂ അര്‍ജുന്‍ രംഗത്തുവന്നിരുന്നു. നടന്മാരായ കാര്‍ത്തി, സൂര്യ എന്നിവര്‍ തമിഴ് സിനിമാ പ്രവര്‍ത്തകരെ സഹായിക്കാന്‍ മുന്നിട്ട് വന്നിരുന്നു.
പ്രതികരിക്കാൻ ഇവിടെ എഴുതുക: