ന്യൂദല്‍ഹി: വിവിധ വിദേശ രാജ്യങ്ങളില്‍ കുടുങ്ങിയ കൊറോണ ബാധിതര്‍ അടക്കമുള്ള ഇന്ത്യക്കാരെ മടക്കിക്കൊണ്ടുവരുന്നതില്‍ ഉത്സാഹവും ധൈര്യവും കാണിച്ച എയര്‍ ഇന്ത്യ ജീവനക്കാര്‍ക്ക് പ്രധാനമന്ത്രിയുടെ പ്രശംസ.
പലയിടങ്ങളിലും ഇതിന്റെ പേരില്‍ എയര്‍ ഇന്ത്യ ജീവനക്കാരെ നാട്ടുകാര്‍ ഓടിക്കുകയാണ്. ചിലയിടങ്ങളില്‍ വാടക വീടുകളില്‍ നിന്നുപോലും ഒഴിപ്പിച്ചു. ഈ സാഹചര്യത്തിലാണ് മോദിയുടെ പ്രശംസ.
എയര്‍ ഇന്ത്യയുടെ ടീമിനെയോര്‍ത്ത് അങ്ങേയറ്റം അഭിമാനമുണ്ട്. വളരെയേറെ ധൈര്യത്തോടെയാണ്, മനുഷ്യത്വത്തോടെയാണ് അവര്‍ ഈ വെല്ലുവിളി ഏറ്റെടുത്തത്. അവരുടെ പരിശ്രമങ്ങളെ ഇന്ത്യ ഒന്നടങ്കം പുകഴ്‌ത്തുകയാണ്, മോദി ട്വിറ്ററില്‍ കുറിച്ചു. ചൈനയിലെ കൊറോണ ബാധിത പ്രദേശങ്ങള്‍, ഇറാന്‍, ഇറ്റലി, ഖത്തര്‍, ഒമാന്‍, സൗദി തുടങ്ങിയ മിക്ക രാജ്യങ്ങളില്‍ നിന്നും ഇന്ത്യക്കാരെ ഒഴിപ്പിച്ചുകൊണ്ടുവന്നത് എയര്‍ ഇന്ത്യയുടെ വിമാനങ്ങളിലാണ്. ഏറ്റവുമൊടുവില്‍ കഴിഞ്ഞ ദിവസം ഇറ്റലിയില്‍ നിന്ന് 263 പേരെയാണ് എത്തിച്ചത്.
