പത്തനംതിട്ട: ജനതാകര്‍ഫ്യൂ ദിനത്തില്‍ വഴിയാത്രക്കാരെ തടഞ്ഞുനിര്‍ത്തി ഭീഷണിപ്പെടുത്തുകയും ദൃശ്യങ്ങള്‍ പകര്‍ത്തി സാമൂഹ്യമാധ്യമങ്ങളില്‍ പ്രചരിപ്പിക്കുകയും ചെയ്ത വ്യക്തിക്കെതിരെ കേസ്. കോണ്‍ഗ്രസ്സ് പ്രവര്‍ത്തകനും ‘പത്തനംതിട്ട മീഡിയ’ വെബ്‌സൈറ്റ് ഉടമയുമായ പ്രകാശ് ഇഞ്ചിത്താനത്തിനെതിരെയാണ് കേസ് റജിസ്റ്റര്‍ ചെയ്തിക്കുന്നത്. മാധ്യമ പ്രവര്‍ത്തകന്‍ എന്ന് സ്വയം പരിചയപ്പെടുത്തിയ ഇയാള്ക്ക് ഇയാള്ക്ക് പത്തനംതിട്ട പ്രസ്സ് ക്ലബ്ബുമായോ പത്രപ്രവര്‍ത്തക യൂണിയനുമായോ യാതൊരു ബന്ധവുമില്ലായെന്ന് പ്രസ്സ് ക്ലബ്ബ് പുറത്തിറക്കിയ പ്രസ്താവനയില്‍ വ്യക്തമാക്കിയിരുന്നു.
കഴിഞ്ഞ ദിവസം പത്തനംതിട്ട സെന്‍ട്രല്‍ ജംഗ്ഷന്‍ വഴി സഞ്ചരിച്ച വഴിയാത്രക്കാരെ തടഞ്ഞുനിര്‍ത്തി ജനതാ കര്‍ഫ്യുവിന്റെ പേരില്‍ ഭീഷണിപ്പെടുത്തിയിരുന്നു. ഇതിന്റെ ദൃശ്യങ്ങള്‍ പകര്‍ത്തുകയും സാമൂഹ്യമാധ്യമങ്ങള്‍ വഴി പ്രചരിപ്പിക്കുകയും ചെയ്തു. സംഭവം ശ്രദ്ധയില്‍പ്പെട്ടതോടെ വിഷയത്തില്‍ വിശദീകരണവുമായി പത്തനംതിട്ട പ്രസ്സ് ക്ലബ്ബ് രംഗത്തുവരുകയായിരുന്നു. മാധ്യമ പ്രവര്‍ത്തകന്‍ എന്നപേരില്‍ ഇയാള്‍ നടത്തുന്ന സദാചാര പോലീസിങ്ങിനോ ഇയാള്‍ നടത്തുന്ന മാധ്യമ സ്ഥാപനത്തിനോ നല്‍കുന്ന വാര്‍ത്തയ്‌ക്കോ പത്തനം തിട്ടയിലെ മാധ്യമ സമൂഹമായി യാതൊരുബന്ധവുമില്ലെന്ന് പ്രസ്സ് ക്ലബ്ബ് വ്യക്തമാക്കി. പ്രസ്സ് ക്ലബ്ബ് കളക്ടര്‍ക്കും എസ്പിക്കും പരാതി നല്‍കുകയും ചെയ്തു.
പത്തനംതിട്ട പ്രസ് ക്ലബ്ബ് പുറത്തിറക്കിയ പ്രസ്താവന
‘പത്തനംതിട്ട മീഡിയ’ എന്ന പേരില്‍ വരുന്ന ഫേസ്ബുക്ക് ലൈവുകള്‍, വാര്‍ത്തകള്‍ എന്നിവയ്‌ക്ക് പത്തനംതിട്ട പ്രസ്‌ക്ലബ്ബുമായോ കേരള പത്രപ്രവര്‍ത്തക യൂണിയനുമായോ യാതൊരു ബന്ധവുമില്ലെന്ന് അറിയിക്കട്ടെ. ഇതുമായി ബന്ധപ്പെട്ട് വാര്‍ത്ത റിപ്പോര്‍ട്ട് ചെയ്യുന്ന ആള്‍ക്കോ അയാളുമായി ബന്ധപ്പെട്ട സ്ഥാപനത്തിനോ പത്തനംതിട്ട പ്രസ്‌ക്ലബ്ബില്‍ പ്രവേശനാനുമതി നേരത്തെ തന്നെ നിഷേധിച്ചിട്ടുള്ളതുമാണ്. സ്വയം മാധ്യമ പ്രവര്‍ത്തകന്‍ ചമഞ്ഞ് ഇയാള്‍ പടച്ചുവിടുന്ന വാര്‍ത്തകള്‍ക്കും സദാചാര പൊലീസിങ്ങിനും പത്തനംതിട്ടയിലെ മാധ്യമ സമൂഹത്തിന് ഉത്തരവാദിത്വം ഇല്ലാത്തതുമാകുന്നു. ഇയാള്‍ക്കെതിരെ നടപടി ആവശ്യപ്പെട്ട് പത്തനംതിട്ട പ്രസ്‌ക്ലബ്ബ് കളക്ടര്‍ക്കും എസ്പിക്കും പരാതിയും നല്‍കിയിട്ടുണ്ട്.
പ്രതികരിക്കാൻ ഇവിടെ എഴുതുക: