ഭോപ്പാല് : മധ്യപ്രദേശില് വിശ്വാസ വോട്ടെടുപ്പ് ഇന്ന് തന്നെ നടത്തണമെന്ന സുപ്രീം കോടതി ഉത്തരവിന് പിന്നാലെ മുഖ്യമന്ത്രി കമല് നാഥിന് ഭൂരിപക്ഷം തെളിയിക്കാനാവില്ലെന്ന് കോണ്ഗ്രസ് നേതാവ് ദിഗ് വിജയ് സിങ്. ഭൂരിപക്ഷം തെളിയിക്കുന്നതിനു വേണ്ട എംഎല്എമാരുടെ പിന്തുണയില്ലെന്നും മുതിര്ന്ന കോണ്ഗ്രസ് നേതാവ് അറിയിച്ചു.
അതേസമയം ഉച്ചക്ക് 12 മണിക്ക് പ്രത്യേക വാര്ത്താസമ്മേളനം വിളിച്ചിട്ടുണ്ട്. ഉച്ചയോടെ തന്നെ രാജി പ്രഖ്യാപനം ഉണ്ടായേക്കുമെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്യുന്നുണ്ട്. 22 എംഎല്എമാരാണ് കഴിഞ്ഞ ദിവസം കോണ്ഗ്രസില് നിന്നും രാജിവെച്ചത്. തുടര്ന്ന് സംസ്ഥാന ഭരണം തന്നെ പ്രതിസന്ധിയിലാവുകയും ഭൂരിപക്ഷ പിന്തുണ ചോദ്യം ചെയ്യപ്പെടുകയും ചെയ്തിരുന്നു.
അഞ്ച് മണിക്കുള്ളില് വിശ്വാസവോട്ടെടുപ്പ് പൂര്ത്തിയാക്കണമെന്നാണ് കോടതി നിര്ദ്ദേശം. വോട്ടെടുപ്പിന്റെ ദൃശ്യങ്ങള് ക്യാമറയില് റെക്കോര്ഡ് ചെയ്യണം. നിയമസഭയില് എത്തുന്ന വിമത എംഎല്എമാര്ക്ക് കര്ണ്ണാടക, മധ്യപ്രദേശ് ഡിജിപിമാര് സംരക്ഷണം ഉറപ്പാക്കണമെന്നും കോടതി നിര്ദ്ദേശിച്ചിട്ടുണ്ട്.
ജ്യോതിരാദിത്യ സിന്ധ്യ കോണ്ഗ്രസില് നിന്നും രാജിവെച്ചതോടെയാണ് മധ്യപ്രദേശില് കമല്നാഥ് സര്ക്കാര് പ്രതിസന്ധിയിലായത്. സിന്ധ്യക്ക് പിന്നാലെ 16 എംഎല്എമാര് രാജിവെച്ചിരുന്നു. ഇവരുടെ രാജി സ്പീക്കര് കഴിഞ്ഞ ദിവസം സ്വീകരിച്ചിരുന്നു. ഇതോടെ സഭയില് കോണ്ഗ്രസ് അംഗങ്ങളുടെ എണ്ണം 92 ആയി ചുരുങ്ങി. ബിജെപിക്ക് നിലവില് 107 അംഗങ്ങളാണുള്ളത്.
