ന്യൂദല്ഹി : നിര്ഭയകേസില് എല്ലാ പഴുതുകളും അടച്ചുകൊണ്ടാണ് കുറ്റവാളികളെ തൂക്കിലേറ്റിയത്. പ്രതികളുടെ വധശിക്ഷ റദ്ദാക്കണമെന്നാവശ്യപ്പെട്ട് ദല്ഹി ഹൈക്കോടതിയില് അര്ധരാത്രിയിലും സുപ്രീംകോടതിയില് പുലര്ച്ചെ മൂന്ന് മണിവരേയും നാടകീയമായ വാദങ്ങള് അരങ്ങേറി. കഴിഞ്ഞ മൂന്ന് തവണത്തേത് പോലെ ഇത്തവണയും വധശിക്ഷ മാറ്റിവേച്ചേക്കുമോയെന്ന് ആശങ്കകള് ഉയര്ന്നെങ്കിലും ഒടുവിലായി പ്രതിഭാഗത്തിന്റെ വാദഗതികളെല്ലാം കോടതി തള്ളുകയായിരുന്നു.
ഇതോടെ ചട്ട പ്രകാരം തന്നെ വധശിക്ഷ നടപ്പാക്കാന് ചുമതലയുള്ള ജയില് ഉദ്യോഗസ്ഥര് യോഗം ചേരുകയും അവസാനവട്ട വിലയിരുത്തലുകള് നടത്തുകയും ചെയ്തു. ആരാച്ചാര് പവനും യോഗത്തില് പങ്കുചേര്ന്നു. ജയില് ഉദ്യോഗസ്ഥരുടെ യോഗത്തിന് മുന്നോടിയായി തീഹാര് ജയിലിനകത്തെ എല്ലാ പ്രവര്ത്തനങ്ങളും നിര്ത്തിവച്ചിരുന്നു. നിര്ഭയ കേസ് പ്രതികളുടെ വധശിക്ഷ നടപ്പാക്കിയ ശേഷം മാത്രം ജയിലിലെ മറ്റു തടവുകാരെ സെല്ലില് നിന്നും പുറത്തിറക്കിയാല് മതിയെന്ന് ജയില് സൂപ്രണ്ട് നിര്ദ്ദേശം നല്കി. സുപ്രീംകോടതി ഹര്ജി തള്ളിയെന്നും വധശിക്ഷ നടപ്പാക്കുകയാണെന്നും ഇതിനിടെ പ്രതികളെ അധികൃതര് അറിയിച്ചിരുന്നു.
അവസാനമായി കുടുംബാംഗങ്ങളെ കാണാന് നാല് പ്രതികളും താത്പര്യം പ്രകടിപ്പിച്ചിരുന്നുവെങ്കിലും ജയില് മാനുവല് പ്രകാരം ബന്ധുക്കളെ കാണാന് ഇനി അവസരം നല്കാനാവില്ലെന്ന് തീഹാര് ജയില് അധികൃതര് വ്യക്തമാക്കി.
തൂക്കിലേറ്റുന്നതിനു മുമ്പുള്ള സമയങ്ങളില് പ്രത്യേകം സെല്ലുകളിലായിരുന്നു നാലു കുറ്റവാളികളെയും പാര്പ്പിച്ചിരുന്നത്. ഇവര് ഭക്ഷണം കഴിക്കാന് പോലും താത്പര്യം കാണിച്ചില്ല. നാലുപേരും രാത്രി മുഴുവന് സമയവും ഉറങ്ങിയില്ല. അവസാന ആഗ്രഹം പോലും നാലുപേരും അറിയിച്ചില്ലെന്നും തീഹാര് ജയില് ഡയറക്ടര് ജനറല് പറഞ്ഞു.
3.30നാണ് നാല് പേരെയും എഴുന്നേല്പ്പിച്ചത്. തുടര്ന്ന് തൂക്കുകയറിലേക്ക് പോകുന്നതിനുള്ള ഒരുക്കങ്ങള് ആരംഭിച്ചു. കനത്ത സുരക്ഷാ വലയത്തിലായിരുന്നു ഈ സമയമത്രയും തീഹാര് ജയിലും പരിസരവും. ജയിലിനുള്ളിലെ തടവുകാരെ എല്ലാവരെയും സെല്ലിനുള്ളില് പൂട്ടിയിട്ടു.
പുലര്ച്ചെ 4.45 ഓടെ പ്രതികളെ ഉദ്യോഗസ്ഥര് അവസാന വട്ട പരിശോധനയ്ക്ക് വിധേയരാക്കി. പ്രതികളുടെയെല്ലാം ശാരീരിക ക്ഷമത തൃപ്തികരമാണെന്ന് ഡോക്ടര് പരിശോധിച്ചു സാക്ഷ്യപ്പെടുത്തി. തുടര്ന്ന് നാല് പ്രതികള്ക്കും പത്ത് മിനിറ്റ് നേരം പ്രാര്ത്ഥനയ്ക്കായി അനുവദിച്ചു. അക്ഷയ് താക്കൂറിന്റെ കുടുംബം അവസാനമായി ഇയാളെ കാണണമെന്ന ആഗ്രഹത്തോടെ ജയിലില് എത്തിയെങ്കിലും ഇനി കാണാനാവില്ലെന്ന് അധികൃതര് അറിയിച്ചു.
പുലര്ച്ചെ അഞ്ച് മണിയോടെ വധശിക്ഷയ്ക്ക് മുന്നോടിയായുള്ള മുപ്പത് മിനിറ്റ് കൗണ്ട്ടൗണ് ആരംഭിച്ചു. പ്രാര്ത്ഥനയ്ക്ക് ശേഷം നാല് പ്രതികളേയും സെല്ലില് നിന്നും തൂക്കുകയറിനടുത്തേക്ക് കൊണ്ടു പോയി. തൂക്കുമുറി എത്തുന്നതിന് തൊട്ടു മുന്പായി നാല് പ്രതികളുടേയും കണ്ണുകള് കറുത്ത തുണി കൊണ്ടു അധികൃതര് മൂടി. ശേഷം അവസാനവട്ട പരിശോധന നടത്തി. എല്ലാ പ്രതികളുടേയും ആരോഗ്യസ്ഥിതി തൃപ്തികരമാണെന്നും തൂക്കിലേറ്റുന്നത് ഒഴിവാക്കാനുള്ള സാഹചര്യമില്ലെന്നും ജയില് മെഡിക്കല് ഓഫീസര് തൂക്കുമുറിയിലുണ്ടായിരുന്ന മജിസ്ട്രേറ്റിനെ സാക്ഷ്യപ്പെടുത്തി.
5.29ഓടെ ജയില് അധികൃതര് നാല് പ്രതികളുടേയും മരണവാറണ്ട് വായിച്ചു കേള്പ്പിച്ചു. ആരാച്ചാരായ പവന് ജല്ലാദിനെ സഹായിക്കാന് നാല് പേരെ അധികൃതര് ചുമതലപ്പെടുത്തിയിരുന്നു. ഇവര് പ്രതികളുടെ കഴുത്തില് തൂക്കുകയര് അണിയിച്ചു. കൃത്യം 5.30 ന് നാല് പ്രതികളുടേയും വധശിക്ഷ നടപ്പായി. 5.31ന് ഇക്കാര്യം ജയില് അധികൃതര് ഔദ്യോഗികമായി സ്ഥിരീകരിച്ചു.
അഞ്ചരയ്ക്ക് ഒരുമിച്ച് തൂക്കിലേറ്റിയ നാല് പേരുടേയും മൃതദേഹങ്ങള് ചട്ടപ്രകാരം അരമണിക്കൂര് സമയം കൂടി തൂക്കുകയറില് തന്നെ കിടന്നു. മരണം പൂര്ണമായും ഉറപ്പാക്കാന് വേണ്ടിയാണ് ഇങ്ങനെ ചെയ്തത്. തുടര്ന്ന് രാവിലെ ആറ് മണിയോടെ നാല് പേരുടേയും മൃതദേഹങ്ങള് തൂക്കുകയറില് നിന്നും അഴിച്ചു മാറ്റി. മൃതദേഹങ്ങള് വിട്ടുതരണം എന്ന് ആവശ്യപ്പെട്ട് നാല് പ്രതികളുടേയും ബന്ധുക്കള് ജയില് അധികൃതരെ സമീപിച്ചിട്ടുണ്ടെങ്കിലും ഇക്കാര്യത്തില് ഇതുവരെയൊരു തീരുമാനം പ്രഖ്യാപിച്ചിട്ടില്ല.
ദീന്ദയാല് ഉപാധ്യായ ആശുപത്രിയിലാണ് പ്രതികളുടെ പോസ്റ്റുമോര്ട്ടം. അതിനുശേഷം മൃതദേഹങ്ങള് ജയിലിലേക്ക് തിരികെ കൊണ്ടു വരുമോ അതോ ബന്ധുകള്ക്ക് വിട്ടുനല്കുമോ എന്നാണ് ഇനിയറിയേണ്ടത്. പാര്ലമെന്റിന്റെ ആക്രമണ കേസ് പ്രതി അഫ്സല് ഗുരുവിന്റെ മൃതദേഹം പോസ്റ്റ്മോര്ട്ടത്തിന് ശേഷം ബന്ധുക്കള്ക്ക് വിട്ടു നല്കാതെ ജയില് വളപ്പില് തന്നെ സംസ്കരിക്കുകയാണ് ചെയ്തത്.
