പ്രചരിക്കുന്നത് അവാസ്തവം; തീരുവ കൂട്ടിയെങ്കിലും പെട്രോള്‍, ഡീസല്‍ വില കൂടില്ല

ന്യൂദല്‍ഹി: കേന്ദ്ര സര്‍ക്കാര്‍ പെട്രോള്‍, ഡീസല്‍ തീരുവ ലിറ്ററിന് മൂന്നു രൂപ വര്‍ദ്ധിപ്പിച്ചു. എന്നാല്‍ ഇവയുടെ വില കൂടില്ല. മാത്രമല്ല നേരിയ തോതില്‍ കുറച്ചിട്ടുമുണ്ട്.

കൊറോണ കാരണം അന്താരാഷ്‌ട്രതലത്തില്‍ അസംസ്‌കൃത എണ്ണവില കുറഞ്ഞു. ഇതനുസരിച്ച് പെട്രോള്‍, ഡീസല്‍ എന്നിവയുടെ ചില്ലറവില്‍പ്പന വിലയില്‍  വരേണ്ട ചെറിയ കുറവ് വരുത്തില്ലെന്നു മാത്രം. അതായത്, പെട്രോളിനും  ഡീസലിനും വില കൂടില്ല. അതേ സമയം, പെട്രോള്‍ വില ലിറ്ററിന് 13 പൈസയും ഡീസല്‍ വില 16 പൈസയും കുറച്ചു.

തീരുവ കൂട്ടിയതു വഴി കേന്ദ്രത്തിന് 39,000 കോടി രൂപ അധികമായി ലഭിക്കും. വില കുറഞ്ഞതു മൂലം കിട്ടുന്ന  ലാഭമായ ഇത്രയും തുക  പെട്രോളിയം കമ്പനികള്‍ കേന്ദ്രത്തിന് നല്‍കും. നിലവില്‍ പെട്രോളിനുള്ള തീരുവ ആറു രൂപയാണ്. ഡീസല്‍ തീരുവ രണ്ടു രൂപയും. ഇവയുടെ എക്‌സൈസ് തീരുവ രണ്ടു രൂപയും ഇവയ്‌ക്കു മേല്‍ ചുമത്തുന്ന റോഡ് സെസ് ഒരു രൂപയുമാണ് കൂട്ടിയത്. നിലവില്‍ റോഡ് സെസ് ഒന്‍പതു രൂപയാണ്. ഇതോടെ പെട്രോളിന്റെ മൊത്തം എക്‌സൈസ് തീരുവ 22.98 രൂപയും ഡീസലിന്റേത് 18.83 രൂപയുമായി. ദല്‍ഹിയില്‍ ഇപ്പോള്‍ പെട്രോള്‍ വില 69.87 രൂപയും ഡീസല്‍ വില 62.58 രൂപയുമാണ്.

അന്താരാഷ്‌ട്ര തലത്തില്‍ എണ്ണവില കുറഞ്ഞതിന്റെ കാര്യമായ പ്രയോജനം ഈ വര്‍ഷം ഇതുവരെ ജനങ്ങള്‍ക്ക് നല്‍കുകയായിരുന്നുവെന്ന് കേന്ദ്രം ചൂണ്ടിക്കാട്ടി. ജനുവരിയില്‍ പെട്രോള്‍ വില (ദല്‍ഹിയില്‍) ലിറ്ററിന് 76.01 രൂപയായിരുന്നു. മാര്‍ച്ച് 14ന് ഇത് 69.87 രൂപയായി. ആറു രൂപയിലേറെ കുറവ്. ഡീസല്‍ വില 69.17 രൂപയായിരുന്നത് 62.58 രൂപയായി. 7.59 രൂപയുടെ കുറവ്.

ഈ സാഹചര്യത്തിലാണ് ഇപ്പോഴുണ്ടായ വിലക്കുറവു മൂലം ലഭിക്കുന്ന വരുമാനം കേന്ദ്രമെടുക്കുന്നത്. ഈ തുക (39,000 കോടി രൂപ) വിവിധ വികസന പ്രവര്‍ത്തനങ്ങള്‍ക്ക് ഉപയോഗിക്കും.