കൊച്ചി: കൊട്ടിയൂര്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച് ഗര്‍ഭിണിയാക്കിയെന്ന കേസിലെ പ്രതി റോബിന്‍ വടക്കുംചേരിയെ വൈദിക വൃത്തിയില്‍ നിന്നും പുറത്താക്കി. പ്രത്യേക അധികാരം ഉപയോഗിച്ച് മാര്‍പ്പാപ്പയാണ് പുറത്താക്കിയത്. കേസില്‍ പ്രതിയായതോടെ വൈദിക വൃത്തിയില്‍ നിന്നും റോബിനെ മാനന്തവാടി രൂപതാധ്യക്ഷന്‍ പുറത്താക്കിയിരുന്നു.
മാര്‍പ്പാപ്പയുടെ നടപടി വത്തിക്കാന്‍ ഔദ്യോഗികമായി റോബിനെ അറിയിച്ചിട്ടുണ്ട്. ബാലാത്സംഗക്കേസില്‍ റോബിന്‍ വടക്കുംചേരിയെ 20 വര്‍ഷത്തെ കഠിന തടവിന് കോടതിശിക്ഷിച്ചിരിക്കുകയാണ്. പോക്‌സോ കേസുകള്‍ അടക്കം മൂന്ന് വകപ്പുകളിലാണ് ശിക്ഷ വിധിച്ചിരിക്കുന്നത്.
2016 ലായിരുന്നു കേസിന് ആസ്പദമായ സംഭവം. കൊട്ടിയൂര്‍ സെന്റ് സെബാസ്റ്റ്യന്‍ പള്ളി വികാരി ആയിരിക്കെ പള്ളിയിലെത്തിയ പ്ലസ് വണ്‍ വിദ്യാര്‍ത്ഥിനിയെ പീഡിപ്പിച്ച് ഗര്‍ഭിണിയാക്കിയെന്നതാണ് കേസ്.
പീഡനത്തിനിരയായ പെണ്‍കുട്ടി പ്രസവിച്ച കുഞ്ഞിനെ അനാഥാലയത്തിലേക്ക് മാറ്റുകയും വിവരം പുറത്തറിയാതിരിക്കാന്‍ വൈദികന്‍ പണം വാഗ്ദാനം ചെയ്യുകയും ചെയ്തു. എന്നാല്‍ പെണ്‍കുട്ടിയുടെ അമ്മ പരാതിയുമായി രംഗത്തെത്തിയതോടെയാണ് വിവരം പുറംലോകമറിഞ്ഞത്. പെണ്‍കുട്ടി പ്രസവിച്ചത് ഫാദര്‍ റോബിന്‍ വടക്കുംചേരിയുടെ കുഞ്ഞിനെയാണെന്ന് പിന്നീട് ഡിഎന്‍എ പരിശോധനയിലൂടെ വ്യക്തമാകുകയും ചെയ്തു.
2017 ലാണ് റോബിന്‍ വടക്കുംചേരി അറസ്റ്റിലായത്. അതേസമയം 1997 ഡിസംബര്‍ 18 ആണ് പെണ്‍കുട്ടിയുടെ ജനന തിയതി ആയി മാതാപിതാക്കള്‍ ആദ്യം അറിയിച്ചത്. എന്നാല്‍ ഇത് 1999 ഡിസംബര്‍ 18 ആണെന്ന് രേഖകള്‍ സഹിതം പ്രോസിക്യുഷന്‍ തെളിയിച്ചതോടെയാണ് റോബിന്‍ വടക്കുംചേരിക്ക് ശിക്ഷ വിധിച്ചത്.
പ്രതികരിക്കാൻ ഇവിടെ എഴുതുക: