തൃശൂര്: പൗരത്വ ഭേദഗതി നിയമത്തിനെതിരായ സമരത്തിന്റെ മറവില് കോണ്ഗ്രസ് നേതാവും എംപിയുമായ ടി.എന്. പ്രതാപന് പണപ്പിരിവ് നടത്തുന്നതായി പരാതി. പ്രതാപന്റെ നാടായ നാട്ടികയില് നിന്ന് 20 ലക്ഷം രൂപ പിരിക്കാന് കമ്മിറ്റി രൂപീകരിച്ചു. ആദ്യ തുക കൈമാറിയതാകട്ടെ സിപിഎം നേതാവും വലപ്പാട് പഞ്ചായത്ത് പ്രസിഡന്റുമായ ഇ.കെ. തോമസും. വലപ്പാട് മഹല്ല് കമ്മിറ്റിയുടെ റാലിക്ക് ശേഷം പരസ്യമായാണ് തുക കൈമാറിയത്.
നിയമത്തിനെതിരെ ടി.എന്. പ്രതാപന് സുപ്രീംകോടതിയില് ഹര്ജി നല്കിയിട്ടുണ്ട്. ഈ കേസ് നടത്താനെന്ന പേരിലാണ് വന് പണപ്പിരിവ്. തൃശൂര് ഡിസിസി പ്രസിഡന്റ് കൂടിയായ പ്രതാപന് നാട്ടികയ്ക്ക് പുറമെ മറ്റു മണ്ഡലങ്ങളിലും കേസിന്റെ പേരില് പണപ്പിരിവ് നടത്താന് പാര്ട്ടി പ്രവര്ത്തകരോട് നിര്ദേശിച്ചിട്ടുണ്ട്. അതേസമയം, ഈ നടപടിക്കെതിരെ പാര്ട്ടിക്കുള്ളില് വ്യാപക രോഷമുയര്ന്നു. ഗ്രൂപ്പ് േദമെന്യേ നേതാക്കള് ഇതിനെതിരെ രംഗത്തെത്തി. പാര്ട്ടി നേതൃത്വം സുപ്രീംകോടതിയെ സമീപിച്ചിട്ടുള്ള സാഹചര്യത്തില് പ്രതാപന് സ്വകാര്യ ഹര്ജി നല്കിയത് അനാവശ്യമായിരുന്നുവെന്ന് വിമര്ശകര് ചൂണ്ടിക്കാണിക്കുന്നു. പണത്തിനും പേരിനും വേണ്ടി യുള്ള അഭ്യാസമാണ് പ്രതാപന് നടത്തുന്നതെന്നാണ് കോണ്ഗ്രസ് നേതാക്കള് തന്നെ വിമര്ശനമുന്നയിക്കുന്നത്.
സിപിഎമ്മുമായി യോജിച്ച് സമരം വേണ്ടെന്ന കെപിസിസി പ്രസിഡന്റിന്റെ നിര്ദേശം അവഗണിച്ച് സിപിഎം നേതാവില് നിന്ന് ആദ്യ തുക സ്വീകരിച്ചതും പ്രതിഷേധത്തിനിടയാക്കി. പണപ്പിരിവ് ഉഷാറായി നടക്കുന്നുണ്ടെങ്കിലും നിയമത്തിനെതിരായ സമരത്തില് തൃശൂര് ഡിസിസി അമ്പേ പരാജയമായെന്നും വിമര്ശിക്കുന്നവര് ചൂണ്ടിക്കാണിക്കുന്നു.
ഡിസിസിയുടെ സമരം ദുര്ബലവും നാമമാത്രവുമായെന്ന് കുറ്റപ്പെടുത്തി കഴിഞ്ഞ ദിവസം ഒരു വിഭാഗം കോണ്ഗ്രസ്സുകാര് സ്വന്തം നിലയ്ക്ക് പ്രതിഷേധ പ്രകടനം സംഘടിപ്പിച്ചു. സിപിഎം, സിപിഐ കക്ഷികളുമായി ചേര്ന്നായിരുന്നു ഇവരുടെ സമരം.
പ്രതാപന്റെ പണപ്പിരിവ് പാര്ട്ടി സംസ്ഥാന നേതൃത്വം അറിഞ്ഞല്ലെന്നും പണം പിരിക്കാന് ആരെയും ചുമതലപ്പെടുത്തിയിട്ടില്ലെന്നും കെപിസിസി നേതൃത്വം പറയുന്നു.
