തിരുവനന്തപുരം : പൗരത്വ ഭേദഗതി നിയമത്തിനെതിരെ സിപിഎമ്മുമായി ചേര്ന്ന് സമരം ചെയ്തതില് തമ്മിലടി നിര്ത്താതെ കോണ്ഗ്രസ്സ്. മറ്റാരും പറയുന്നതല്ല കെപിസിസി അധ്യക്ഷനായ താന് പറയുന്നതാണ് പാര്ട്ടി നയമെന്ന് ചെന്നിത്തലയെ പരോക്ഷമായി വിമര്ശിച്ചുകൊണ്ട് മുല്ലപ്പള്ളി രാമചന്ദ്രന്. സിപിഎമ്മുമായി ചേര്ന്ന് നടത്തിയ സമരത്തിന്റെ പേരില്സാമൂഹിക മാധ്യമങ്ങളില് അടക്കം പാര്ട്ടി പ്രവര്ത്തകര് ഗ്രൂപ്പ് തിരിഞ്ഞ് തമ്മിലടി തുടരവേയാണ് കോണ്ഗ്രസ്സ് ഔദ്യോഗിക നിലപാട് വ്യക്തമാക്കിക്കൊണ്ട് മുല്ലപ്പള്ളി രംഗത്ത് വന്നിരിക്കുന്നത്. കേരളത്തില് നിലവിലുള്ളത് ഭരണകൂട ഭീകരതയാണെന്നും അവരുമായി കൈകോര്ത്തതില് കോണ്ഗ്രസ് പ്രവര്ത്തകര്ക്ക് അതൃപ്തിയുണ്ടെന്നും മുല്ലപ്പള്ളി പറഞ്ഞു.
പിണറായി വിജയനോട് വ്യക്തിപരമായി ശത്രുതയില്ലെന്നും സൗഹൃദമാണ് ഉള്ളതെന്നും എന്നാല് സിപിഎമ്മിന്റെ ബിജെപി വിരുദ്ധ നിലപാടില് ആത്മാര്ത്ഥതയില്ലെന്നും മുല്ലപ്പള്ളി ആരോപിച്ചു. സിപിഎമ്മുമായി യോജിച്ചുപോകുന്നതല്ല കോണ്ഗ്രസ് നിലപാട്. ആ നിലാട് ഇതുവരെ മാറ്റിയിട്ടില്ലെന്നും നിലപാടില് മാറ്റമുണ്ടാകണമെങ്കില് യോഗത്തില് തീരുമാനമെടുക്കണമെന്നും എന്നാല് ഇതേവരെ ഈ വിഷയം ചര്ച്ച ചെയ്യാന് അത്തരത്തില് ഒരു യോഗം ചേര്ന്നിട്ടില്ലെന്നും മുള്ളപ്പള്ളി പറഞ്ഞു. ഈ വിഷയത്തില് രമേശ് ചെന്നത്തലയുടെ ഉദ്ദേശശുദ്ധിയെ ചോദ്യം ചെയ്യാന് താനില്ലെന്നും മുല്ലപ്പള്ളി കൂട്ടിച്ചേര്ത്തു.
വിഷയത്തില് പോര് മുറുകുന്നതിനിടയില് ചെന്നിത്തലക്ക് പിന്തുണയുമായി മുസ്ലീലീഗ് രംഗത്തെത്തി. സിപിഎമ്മുമായി കൈകോര്ക്കുന്നതിനെ എതിര്ത്ത മുല്ലപ്പള്ളിക്കെതിരെ ലീഗ് സംസ്ഥാന സെക്രട്ടറി കെപിഎ മജീദ് വിയോജിപ്പ് അറിയിച്ചു. സിപിഎമ്മുമായി ചേര്ന്ന് സമരം നടത്തണമെന്നും മുസ്ലീം ലീഗ് ഇക്കാര്യത്തില് രമേശ് ചെന്നിത്തലക്കൊപ്പമാണെന്നും മജീദ് പറഞ്ഞു. യോജിച്ച സമരമാണ് വേണ്ടത് എന്ന് സിപിഎം കേന്ദ്ര കമ്മിറ്റി അംഗവും വ്യവസായ വകുപ്പ് മന്ത്രിയുമായ ഇ.പി ജയരാജനും വ്യക്തമാക്കി.
