ചാരുംമൂട്: വനിതകള് ഉള്പ്പെട്ട വാട്സ്ആപ് ഗ്രൂപ്പില് അശ്ലീലചിത്രം പ്രചരിപ്പിച്ച സിപിഎം. നേതാവിനെ പാര്ട്ടിയില്നിന്നു പുറത്താക്കാന് ശുപാര്ശ. സിപിഎം പാലമേല് വടക്കിലെ പ്രമുഖനെതിരെയാണ് നടപടി. കഴിഞ്ഞ ദിവസം ജി. രഘുവിന്റെ അധ്യക്ഷതയില് ചേര്ന്ന ചാരുംമൂട് ഏരിയ കമ്മിറ്റി യോഗത്തിലാണ് തീരുമാനമെടുത്തത്. രണ്ടാഴ്ച മുമ്പാണ് ഗോവിന്ദപ്പിള്ള സ്മാരക ലൈബ്രറിയെന്ന സിപിഎമ്മിന്റെ വാട്സ്ആപ് ഗ്രൂപ്പില് അശ്ലീലചിത്രം പ്രചരിച്ചത്. ഇതുവിവാദമായപ്പോള് നേതാവ് മൂന്നുമാസത്തേക്ക് പാര്ട്ടിയില്നിന്നു അവധിയെടുത്തു.
ഏരിയ കമ്മിറ്റിയംഗങ്ങളായ കെ. മനോഹരന്, ബി. ബിനു എന്നിവരെ പാര്ട്ടി അന്വേഷണ കമ്മിഷനായും നിയമിച്ചു. അന്വേഷണ കമ്മിഷന്റെ റിപ്പോര്ട്ട് ഏരിയ കമ്മിറ്റി ചര്ച്ച ചെയ്തശേഷമാണ് നേതാവിനെ പാര്ട്ടിയില്നിന്നു പുറത്താക്കുവാന് ജില്ലാ കമ്മിറ്റിക്ക് ശുപാര്ശ നല്കാന് തീരുമാനിച്ചത്. ജില്ലാ കമ്മിറ്റിയുടെ നടപടി ഉടന് ഉണ്ടാകും. വരുന്ന തദ്ദേശ സ്വയംഭരണ തെരഞ്ഞെടുപ്പിലൂടെ പാലമേല് ഗ്രാമപഞ്ചായത്ത് പ്രസിഡന്റ് സ്ഥാനത്തേക്ക് എത്താമെന്ന മോഹം ഇതോടെ തകര്ന്നടിഞ്ഞു. നേതാവിന്റെ പാര്ട്ടിയിലുള്ള ചിലര് തന്നെയാണ് ഇദ്ദേഹത്തെ ഒരുക്കാന് ശ്രമിച്ചതെന്നാണ് സംസാരം.
