തിരുവനന്തപുരം: അയോധ്യ കേസിലെ സുപ്രീംകോടതി വിധിയെ വര്ഗീയമായി അപമാനിക്കാന് ശ്രമിച്ച എംഎല്എയുടെ ഫേസ്ബുക്ക് പോസ്റ്റിനെതിരെ മറുപടി എന്തെന്ന് ആരാഞ്ഞ് ഗവര്ണര് ആരിഫ് മുഹമ്മദ് ഖാന്.
വിവാദ പോസ്റ്റിട്ടതിന് സിപിഎം എംഎല്എ എം. സ്വരാജിനെതിരെ നിയമ നടപടി സ്വീകരിക്കണമെന്ന പരാതിയില് മറുപടി നല്കാനാണ് സര്ക്കാരിനോട് ഗവര്ണര് നിര്ദേശിച്ചത്. ഡെപ്യൂട്ടി സെക്രട്ടറിക്കാണ് ഗവര്ണറുടെ ഡെപ്യൂട്ടി സെക്രട്ടറി രേഖാമൂലം നിര്ദേശം നല്കിയത്. ഭാരതത്തിന്റെ പരമോന്നത നീതിപീഠത്തെയും ചരിത്രപ്രധാനമായ അതിന്റെ ഐകകണ്ഠ്യേനയുള്ള വിധിയെയും മുഴുവന് രാഷ്ട്രത്തെയും അവഹേളിക്കുന്ന രീതിയില് സമൂഹമാധ്യമത്തിലൂടെ പ്രചാരണം നടത്തിയ സ്വരാജിനെതിരെ നടപടിയാവശ്യപ്പെട്ട് ബിജെപി ആലപ്പുഴ നിയോജക മണ്ഡലം പ്രസിഡന്റ് ജി. വിനോദ് കുമാറാണ് ഗവര്ണര്ക്ക് പരാതി നല്കിയത്. പരാതി പ്രാധാന്യത്തോടെ പരിഗണിച്ച് മറുപടി നല്കണമെന്നാണ് ഗവര്ണര് നിര്ദേശിച്ചിരിക്കുന്നത്.
വര്ത്തമാനകാല ഇന്ത്യയില് മറിച്ചൊരു വിധിയുണ്ടാകുമെന്ന് നിഷ്കളങ്കരേ, നിങ്ങളിപ്പോഴും പ്രതീക്ഷിച്ചിരിക്കുന്നുവോ? എന്നായിരുന്നു അയോധ്യ വിധിക്ക് പിന്നാലെയുള്ള സ്വരാജിന്റെ വര്ഗീയ വിഷം ചീറ്റുന്ന ഫേസ്ബുക്ക് പോസ്റ്റ്. അയോധ്യ വിധിയുടെ പശ്ചാത്തലത്തില് സോഷ്യല് മീഡിയയില് അടക്കം സംഘര്ഷപരമായ പരാമര്ശം പാടില്ലെന്ന് മുഖ്യമന്ത്രിപിണറായി വിജയനും കേരള പോലീസും പലതവണ ആവര്ത്തിച്ചിരുന്നു. ഇത് മറികടന്നായിരുന്നു സ്വരാജിന്റെ പോസ്റ്റ് എന്നത് സംഭവത്തിന്റെ ഗൗരവം വര്ധിപ്പിക്കുന്നു.
