കൊച്ചി: പൗരത്വ ഭേദഗതി ബില്‍ നടപ്പാക്കില്ലെന്നു വെല്ലുവിളിച്ച മുഖ്യമന്ത്രി പിണറായി വിജയനെ തള്ളി ഗവര്‍ണര്‍ ആരിഫ് മുഹമ്മദ് ഖാന്‍. നിയമം പാലിക്കാന്‍ എല്ലാവരും ബാധ്യസ്ഥരാണ്. ബില്‍ ഒരു സമുദായത്തെ ലക്ഷ്യം വച്ചുള്ളതല്ല, ഗവര്‍ണര്‍ പറഞ്ഞു. ബില്ലിനെതിരേയുള്ള പ്രതിഷേധങ്ങള്‍ രാഷ്ട്രീയ പ്രേരിതമാണെന്നും ഗവര്‍ണര്‍ തുറന്നടിച്ചു.
ഉത്തരവാദിത്വത്തില്‍ നിന്ന് ആര്‍ക്കും ഒഴിഞ്ഞുമാറാനാകില്ല. ഭരണഘടന യനുസരിച്ച് കേന്ദ്ര നിയമങ്ങള്‍ അനുസരിക്കാന്‍ എല്ലാവരും ബാധ്യസ്ഥരാണ്, ആലുവ പാലസില്‍ മാധ്യമപ്രവര്‍ത്തകരോട് സംസാരിക്കവേ ഗവര്‍ണര്‍ പറഞ്ഞു. കേരളം നടപ്പാക്കിലെന്ന മുഖ്യമന്ത്രിയുടെ പ്രസ്താവനയെക്കുറിച്ച് പ്രതികരിക്കാനില്ല. അതില്‍ രാഷ്ടീയക്കാരാണ് അഭിപ്രായം പറയേണ്ടത്. കേന്ദ്രത്തിന്റെയും സംസ്ഥാനത്തിന്റെയും അധികാരപരിധി ഭരണഘടനയില്‍ നിര്‍വചിക്കപ്പെട്ടിട്ടുണ്ട്. ഉത്തരവാദിത്വത്തില്‍ നിന്നും ആര്‍ക്കും ഒഴിഞ്ഞുമാറാനാകില്ല. തെരഞ്ഞെടുക്കപ്പെട്ട സര്‍ക്കാരിലും ഇന്ത്യന്‍ ഭരണഘടനയിലും തനിക്ക് വിശ്വാസമുണ്ട്.
ബില്ലില്‍ ആശങ്കപ്പെടേണ്ടതായി ഒന്നുമില്ല. ആരുടെയും പൗരത്വം ഇതിലൂടെ നഷ്ടമാവുകയുമില്ല. ജനങ്ങള്‍ക്ക് രാഷ്ട്രീയ തീരുമാനങ്ങളിലൂടെ എന്ത് പ്രശ്‌നമുണ്ടായാലും സംരക്ഷകരായി ഇവിടെ കോടതിയുണ്ടെന്നും അദ്ദേഹം അഭിപ്രായപ്പെട്ടു.
പൗരത്വ ബില്ലിനെതിരായ മതതീവ്രവാദികളുടെ പ്രതിഷേധത്തെ അംഗീകരിക്കുന്ന തരത്തില്‍ കഴിഞ്ഞ ദിവസങ്ങളില്‍ സംസാരിച്ച മുഖ്യമന്ത്രി പിണറായി വിജയനുള്ള മറുപടിയായാണ് ഗവര്‍ണറുടെ പ്രസ്താവനയെ നിരീക്ഷകര്‍ വിലയിരുത്തുന്നത്. സാധ്യമായ എല്ലാ വേദികളിലും പൗരത്വ ഭേദഗതി ബില്ലിനെ കേരളം ചോദ്യം ചെയ്യുമെന്നും കേരളത്തില്‍ നടപ്പാക്കില്ലെന്നുമാണ് മുഖ്യമന്ത്രി പറഞ്ഞത്. നിലപാട് ആവര്‍ത്തിച്ച് ഇന്നലെയും പിണറായി വിജയന്‍ രംഗത്തു വന്നു. കഴിഞ്ഞ ദിവസങ്ങളില്‍ കേന്ദ്ര സര്‍ക്കാരിനെ വിമര്‍ശിച്ച മുഖ്യമന്ത്രി ഇന്നലെ ആര്‍എസ്എസിനെക്കൂടി കുറ്റപ്പെടുത്തി. ആര്‍എസ്എസിന്റെ ഫാസിസ്റ്റ് നയമാണ് നിയമത്തിനു പിന്നിലെന്നാണ് മുഖ്യമന്ത്രി പറഞ്ഞത്.
