ന്യൂദല്ഹി : പ്രായപൂര്ത്തിയാകാത്ത ഒരാളെപോലും സംസ്ഥാനത്തെ ജയിലുകളില് പാര്പ്പിച്ചിട്ടില്ലെന്ന് ജമ്മു കശ്മീര് ഹൈക്കോടതി. ആര്ട്ടിക്കിള് 370 റദ്ദാക്കിയതുമായി ബന്ധപ്പെട്ട് ഹൈക്കോടതി സുപ്രീംകോടതിയില് നല്കിയ റിപ്പോര്ട്ടിലാണ് ഇക്കാര്യം വെളിപ്പെടുത്തിയിരിക്കുന്നത്. ജമ്മു കശ്മീര് ഹൈക്കോടതിയിലെ നാലു ജഡ്ജിമാര് സംസ്ഥാനത്തെ മുഴുവന് ജയിലിലും സന്ദര്ശനം നടത്തിയിരുന്നു. ഇതിനു ശേഷമാണ് റിപ്പോര്ട്ട് സമര്പ്പിച്ചത്.
സംസ്ഥാനത്തെ ജയിലുകളില് പ്രായപൂര്ത്തിയാകാത്തവരെ തടഞ്ഞുവെച്ചിരിക്കുകയാണെന്ന് പ്രതിപക്ഷം ഉള്പ്പടെയുള്ളവര് ആരോപണം ഉന്നയിച്ചിരുന്നു. എന്നാല് ഇത് തെറ്റാണെന്നും അത്തരത്തില് ഒരാള് പോലും ജമ്മു കശ്മീര് ജയിലുകളില് ഇല്ലെന്നും ജഡ്ജിമാരുടെ റിപ്പോര്ട്ടില് പറയുന്നുണ്ട്. ആര്ട്ടിക്കിള് 370, ആര്ട്ടിക്കിള് 35 എ എന്നിവ റദ്ദാക്കിയത് മൂലം സംസ്ഥാനത്തിന്റെ പ്രത്യേക പദവി ഇല്ലാതായെന്ന് മാത്രമാണെന്നും ഹൈക്കോടതി സുപ്രീംകോടതിയില് വ്യക്താമാക്കിയിട്ടുണ്ട്.
ജമ്മു കശ്മീരില് പ്രായപൂര്ത്തിയാകാത്തവരെ ജയിലില് തടഞ്ഞുവെച്ചിട്ടുണ്ടെന്ന് ആരോപിച്ച് സുപ്രിംകോടതിയില് ഹര്ജി ഫയല് ചെയ്തിരുന്നു. ആക്ടിവിസ്റ്റ് എനാക്ഷി ഗാംഗുലിയായിരുന്നു ഹര്ജി സമര്പ്പിച്ചത്. മുന് ചീഫ് ജസ്റ്റിസ് രഞ്ജന് ഗോഗോയ് സെപ്തംബറില് ഹര്ജി കേട്ടശേഷം റിപ്പോര്ട്ട് സമര്പ്പിക്കാന് ഹൈക്കോടതിക്ക് നിര്ദ്ദേശം നല്കി. ഇതിന്റെ അടിസ്ഥാനത്തിലാണ് ജഡ്ജിമാരുടെ സംഘം പരിശോധന നടത്തിയത്.
ജമ്മു കശ്മീരിന്റെ പ്രത്യേക പദവി റദ്ദാക്കിയതോടെ നിരവധി കുട്ടികളെ സുരക്ഷാ ഉദ്യോഗസ്ഥര് തടഞ്ഞുവച്ചിരിക്കുകയാണെന്ന് ആഗസ്റ്റില് സമര്പ്പിച്ച് ഹേബിയസ് കോര്പ്പസ് ഹര്ജിയില് ആരോപിച്ചിരുന്നു.
