ധന്ബാദ് (ഝാര്ഖണ്ഡ്): കോണ്ഗ്രസിന്റെ കുപ്രചാരണങ്ങളില് കുടുങ്ങരുതെന്ന് വടക്കുകിഴക്കന് സംസ്ഥാനങ്ങളിലെ ജനങ്ങളോട് പ്രധാനമന്ത്രി നരേന്ദ്ര മോദി അഭ്യര്ഥിച്ചു. വടക്കുകിഴക്കന് സംസ്ഥാനങ്ങളുടെ തനിമയെ ഒരു തരത്തിലും ദേശീയ പൗരത്വ ഭേദഗതി ബില് ബാധിക്കില്ല. കോണ്ഗ്രസ് കള്ളങ്ങള് പ്രചരിപ്പിക്കുകയാണ്. ആസാം അടക്കമുള്ള സംസ്ഥാനങ്ങളുടെ ഭാഷയോ സംസ്കാരമോ അപകടത്തിലാവില്ല. സംസ്ഥാന സര്ക്കാരുകളുമായി സഹകരിച്ച് മേഖലയുടെ വികസനത്തിലാണ് കേന്ദ്ര സര്ക്കാര് ശ്രമിക്കുന്നത്. അതാണ് ലക്ഷ്യവും. രാഷ്ട്രീയ നേട്ടത്തിനായി കോണ്ഗ്രസ് ജനങ്ങളെ വഴിതെറ്റിക്കാനാണ് ശ്രമിക്കുന്നത്. അതില് വീണുപോകരുത്, ഝാര്ഖണ്ഡിലെ ധന്ബാദില് തെരഞ്ഞെടുപ്പു പ്രചാരണയോഗത്തില് സംസാരിക്കവെ മോദി പറഞ്ഞു.
ആസാമിലെ ചെറുപ്പക്കാര് ഒരു തരത്തിലും ആശങ്കപ്പെടരുത്. നിങ്ങളുടെ അവകാശങ്ങള് കവര്ന്നെടുക്കാന് ആര്ക്കും സാധിക്കില്ല. അതിന് ആരും ശ്രമിക്കുന്നുമില്ല. പൗരത്വ ബില്ലിന്റെ പേരില് മേഖലയില് കലാപത്തിനാണ് ചില കേന്ദ്രങ്ങള് ശ്രമിക്കുന്നത്. മേഖലയുടെ ഏറിയ പങ്കും ബില്ലിന്റെ പിരിധിക്കു പുറത്താണ്. എന്നിട്ടും തെറ്റായ സന്ദേശങ്ങള് പ്രചരിപ്പിച്ച് കലാപത്തിനു നീക്കം നടത്തുന്നവരെ തിരിച്ചറിയണം. നിയമവിരുദ്ധമായി നുഴഞ്ഞുകയറിയവരെക്കുറിച്ചാണ് കോണ്ഗ്രസിനും ഘടകകക്ഷികള്ക്കും ആശങ്ക, പ്രധാനമന്തി കുറ്റപ്പെടുത്തി.
നിലവില് ഇന്ത്യന് പൗരത്വമുള്ളവര്, അത് ഹിന്ദുക്കളായാലും മുസ്ലീങ്ങളായാലും ക്രിസ്ത്യാനികളായാലും ആരായാലും അവര്ക്കൊന്നും ഈ ബില് ബാധകമല്ലെന്നും പ്രധാനമന്ത്രി വിശദീകരിച്ചു. 2014 ഡിസംബര് 31നു മുമ്പ് ഇന്ത്യയിലേക്ക് എത്തിയ എല്ലാ അഭയാര്ഥികള്ക്കും പൗരത്വം നല്കും.
ഇന്ത്യയില് അഭയം തേടിയ പാക്കിസ്ഥാനിലെ ന്യൂനപക്ഷങ്ങളെ സംരക്ഷിക്കുമെന്ന് പലതവണ പറഞ്ഞ കോണ്ഗ്രസ് ഒന്നും ചെയ്തില്ലെന്നും പ്രധാനമന്ത്രി കുറ്റപ്പെടുത്തി. പാക്കിസ്ഥാനില് കഴിഞ്ഞതുപോലെയാണ് അവര് കോണ്ഗ്രസ് ഭരണത്തില് ഇന്ത്യയില് ജീവിച്ചത്, മോദി പറഞ്ഞു.
കോണ്ഗ്രസ് മനപ്പൂര്വം വഷളാക്കിയ അയോധ്യ പ്രശനം എന്ഡിഎ സര്ക്കാര് പരിഹരിച്ചെന്ന് പ്രധാനമന്ത്രി പറഞ്ഞു. രാമജന്മഭൂമി വര്ഷങ്ങളായി വിവാദങ്ങളില് കുടുങ്ങിയിരിക്കുകയായിരുന്നു. കോണ്ഗ്രസ് മനപ്പൂര്വം ഇത് വഷളാക്കി. പരിഹരിക്കാന് ശ്രമിച്ചില്ല. രാമക്ഷേത്ര പ്രശ്നം സമാധാനപരമായി പരിഹരിക്കുമെന്ന് ബിജെപിയുടെ തെരഞ്ഞെടുപ്പുപത്രികയില് പറഞ്ഞിരുന്നു. അതു പാലിച്ചു. ഉജ്വലമായ തരത്തില് രാമക്ഷേത്രമുയരുന്നതിനുള്ള സാഹചര്യം ഒരുങ്ങിയിരിക്കുന്നു, പ്രധാനമന്ത്രി പറഞ്ഞു.
