നാല് ഭാഷകളിലായി ഒരു പോലെ ഒരുക്കുന്ന മാമാങ്കം മലയാള സിനിമാ ചരിത്രം തന്നെ മാറ്റി മറിക്കാനൊരുങ്ങുന്നു. ‘മാമാങ്ക’ത്തിന് അമേരിക്കയിൽ വലിയ തയ്യാറെടുപ്പുകൾ ആണ് നടക്കുന്നത്. അമേരിക്കയിലെ എല്ലാ പ്രമുഖ സിറ്റികളിലുള്ള എഴിപത്തിയഞ്ചിൽ പരം തീയേറ്ററുകളിൽ സിനിമ പ്രദർശിപ്പിക്കും. മൈഡസ് എന്റർടൈൻമെന്റിന്റെ ബാനറിൽ ഡോക്ടർ ദീപു സുധാകരനാണ് അമേരിക്കയിലെങ്ങും ഈ സിനിമ വിതരണത്തിനെടുത്തിരിക്കുന്നത്.
മെഗാസ്റ്റാർ മമ്മൂട്ടിയുടെ മാമാങ്കത്തിൽ നിരവധി പ്രമുഖ താരങ്ങളുടെ ഒരു നീണ്ട നിര തന്നെ ഉണ്ട്. പ്രശസ്ത സംവിധായകൻ എം.പദ്മകുമാറിന്റെ സംവിധാനത്തിൽ കാവ്യാ ഫിലിംസിനു വേണ്ടി വേണു കുന്നപ്പള്ളി നിർമിക്കുന്ന ഈ സിനിമ കേരളത്തിൽ നിന്നും ലോകത്തിനായി അവതരിപ്പിക്കുന്ന സിനിമയായി നേരത്തെ തന്നെ പ്രവചിച്ചിരുന്നു. ഏറ്റവും കൂടുതൽ മുതൽ മുടക്കുള്ള സിനിമയായി ഇത് ചരിത്രത്തിൽ ഇടം നേടിക്കഴിഞ്ഞു.
നാല്പത്തി അഞ്ച് രാജ്യങ്ങളിൽ ആദ്യമായാണ് ഒരു മലയാള സിനിമ തീയേറ്ററുകളിൽ പ്രദർശിപ്പിക്കുന്നത്. ഫാർസ് ഫിലിംസ് ആണ് ഈ സിനിമയുടെ രാജ്യാന്തര വിതരണക്കാർ. ഹിന്ദി, മലയാളം, തമിഴ്, തെലുങ്ക് എന്നീ ഭാഷകളിൽ ആണ് ഈ സിനിമ ഇറങ്ങുന്നത്. ഉണ്ണി മുകുന്ദൻ, അനു സിത്താര, കനിഹ, സിദ്ദിഖ്, സുരേഷ് കൃഷ്ണ എന്നിങ്ങനെ നിരവധി പേരും ഈ സിനിമയിലുണ്ട്. ആദ്യമായി പ്രാചി തെഹ്‌ലാൻ എന്ന തെന്നിന്ത്യൻ നടി മമ്മൂട്ടിയുടെ നായികയായി രംഗപ്രവേശം ചെയ്യുന്നു.
അമേരിക്കയിൽ പ്രദർശിപ്പിക്കുന്ന തിയേറ്ററുകളുടെ കൂടുതൽ വിവരങ്ങൾ അറിയാൻ www.midasent.com എന്ന വെബ്സൈറ്റ് സന്ദർശിച്ചാൽ മാത്രം മതി. അമേരിക്കയിലെ മമ്മൂട്ടി ഫാൻസ്‌ അസോസിയേഷൻ തങ്ങളുടെ നായകന്റെ സിനിമ ആഘോഷിക്കാനുള്ള തയ്യാറെടുപ്പിലാണ്. ലോസ് ആഞ്ചേലസ് കേന്ദ്രമായാണ് ഫാൻസ്‌ അസോസിയേഷൻ പ്രവർത്തിക്കുന്നത്. ഇന്ത്യൻ സിനിമയിലെ തന്നെ വിസ്മയം ആയിരിക്കും മാമാങ്കം എന്ന് സിനിമാ പ്രവർത്തകർ ഒന്നടങ്കം പ്രഖ്യാപിക്കുന്നു.
പ്രതികരിക്കാൻ ഇവിടെ എഴുതുക: