ന്യൂദല്ഹി: കുട്ടികള്ക്കെതിരായ ലൈംഗികാതിക്രമണത്തില് പോക്സോ കേസ് നേരിടുന്നവര്ക്ക് ദയാഹര്ജിക്ക് അവസരം നല്കേണ്ടതില്ലെന്ന് രാഷ്ട്രപതി രാംനാഥ് കോവിന്ദ്. രാജസ്ഥാനില് ‘സാമൂഹ്യപരിവര്ത്തനത്തിന് സ്ത്രീ ശാക്തീകരണം’ എന്ന പരിപാടിയില് സംസാരിക്കുകയായിരുന്നു അദ്ദേഹം.
”പെണ്കുഞ്ഞുങ്ങളെ ബലാത്സംഗം ചെയ്യുന്നവര്ക്ക് ദയാഹര്ജി അനുവദിക്കരുത്. ഇത് പാര്ലമെന്റ് പരിശോധിക്കണം. നിയമഭേദഗതി കൊണ്ടുവരണം. പെണ്കുട്ടികളെ ബഹുമാനിക്കാന് ആണ്കുട്ടികളെ പഠിപ്പിക്കേണ്ട ഉത്തരവാദിത്വം സമൂഹത്തിനുണ്ട്”, രാഷ്ട്രപതി ചൂണ്ടിക്കാട്ടി.
സ്ത്രീ സുരക്ഷ പ്രധാനമാണ്. ഇതിനായി നിരവധി കാര്യങ്ങള് ചെയ്തിട്ടുണ്ട്. ഇനിയും ചെയ്യാനുണ്ട്. സ്ത്രീകള്ക്കെതിരായ നിഷ്ഠുര ആക്രമണങ്ങളില് രാജ്യത്തിന്റെ ആത്മാവ് അസ്വസ്ഥമാണ്. സ്ത്രീ ശാക്തീകരണത്തിലൂടെ മാത്രമേ തുല്യതയുള്ള സമൂഹത്തെ സൃഷ്ടിക്കാന് സാധിക്കൂവെന്നും അദ്ദേഹം വിശദീകരിച്ചു. തെലങ്കാനയില് യുവതിയെ പീഡിപ്പിച്ച് കൊലപ്പെടുത്തിയ കേസിലെ പ്രതികള് ഏറ്റുമുട്ടലില് കൊല്ലപ്പെട്ട പശ്ചാത്തലത്തിലാണ് രാഷ്ട്രപതിയുടെ പരാമര്ശം.
