ചെന്നൈ: ഇന്ത്യയുടെ രണ്ടാമത് ചാന്ദ്രദൗത്യമായ ചന്ദ്രയാന് രണ്ടിലെ ലാന്ഡര് വിക്രത്തെ തകര്ന്ന നിലയില് കണ്ടെത്തി. നാസയുടെ ചിത്രങ്ങള് വിശകലനം ചെയ്ത് ഇത് കണ്ടെത്തിയത് ചെന്നൈ സ്വദേശിയും. അമേരിക്കയുടെ ബഹിരാകാശ ഏജന്സിയായ നാസയുടെ ചിത്രങ്ങളില് നടത്തിയ വിശകലനത്തിലാണ് മെക്കാനിക്കല് എഞ്ചിനീയറായ ഷണ്മുഖ സുബ്രഹ്മണ്യന് ചന്ദ്രോപരിതലത്തില് വിക്രത്തിന്റെ അവശിഷ്ടങ്ങള് കണ്ടെത്തിയത്. ഇദ്ദേഹത്തെ നാസ അഭിനന്ദിച്ചു.
ചെന്നൈയിലെ ലെനോക്സ് ഇന്ത്യ ടെക്നോളജി സെന്ററിലെ ഉദ്യോഗസ്ഥനാണ് ഷണ്മുഖ സുബ്രഹ്മണ്യന്. നാസയുടെ ലൂണാര് റെക്കണൈസന്സ് ഓര്ബിറ്റര് (എല്ആര്ഒ) പകര്ത്തിയ ചന്ദ്രോപരിതലത്തിന്റെ ദൃശ്യങ്ങള് ലോകത്തിന്റെ വിവിധ ഭാഗങ്ങളില് സൂക്ഷ്മ നിരീക്ഷണം നടത്തുന്നുണ്ടായിരുന്നു. ഇങ്ങനെ വിക്രത്തിന്റെ ലാന്ഡിങ്ങിന് മുന്പും ശേഷവുമുള്ള ചിത്രങ്ങള് താരതമ്യം ചെയ്തപ്പോള് ചിത്രങ്ങളില് അസാധാരണമായി എന്തോ ഉണ്ടെന്ന് സുബ്രഹ്മണ്യന് നാസയെ അറിയിച്ചു. തുടര്ന്ന് നാസ ഇത് സ്ഥിരീകരിച്ചു. സുബ്രഹ്മണ്യന് നന്ദി അറിയിച്ചു.
”ലാന്ഡര് വിക്രത്തെക്കുറിച്ചുള്ള കണ്ടെത്തലുകള് നാസയെ അറിയിച്ചതിനു നന്ദി. വിക്രം പതിക്കുന്നതിന് മുന്പും ശേഷവുമുള്ള ചിത്രങ്ങള് തമ്മിലുള്ള വ്യത്യാസം സ്ഥിരീകരിച്ചു. ഈ വിവരങ്ങള് അടിസ്ഥാനമാക്കി വിക്രം പതിച്ച പ്രദേശത്ത് കൂടുതല് തെരച്ചില് നടത്തും. ഇനിയും അവശിഷ്ടങ്ങള് ഉണ്ടോയെന്ന് നോക്കും. ഈ കണ്ടെത്തലിന്റെ അംഗീകാരം സുബ്രഹ്മണ്യനുള്ളതാണ്”, ഓര്ബിറ്റര് ദൗത്യത്തിന്റെ ചുമതലയുള്ള ശാസ്ത്രജ്ഞന് ജോണ് കെല്ലര് അറിയിച്ചു.
ചന്ദ്രന്റെ ഉപരിതലത്തില് ഇടിച്ചിറങ്ങിയ വിക്രത്തിന്റെ അവശിഷ്ടങ്ങളുടെ ചിത്രങ്ങളും നാസ ട്വിറ്ററില് പങ്കുവച്ചിട്ടുണ്ട്. ലാന്ഡര് വിക്രം ചന്ദ്രനില് സോഫ്റ്റ്ലാന്ഡിങ് നടത്തേണ്ട സ്ഥലത്ത് നിന്ന് 750 മീറ്റര് വടക്ക് പടിഞ്ഞാറ് മാറിയാണ് അവശിഷ്ടങ്ങള് കണ്ടെത്തിയത്. വിക്രം ചന്ദ്രനില് പതിച്ചത് മുതല് അതിനെ കണ്ടെത്താനുള്ള ശ്രമത്തിലായിരുന്നു നാസ. ഇതിനു വേണ്ടിയുള്ള ആദ്യ ശ്രമങ്ങളെല്ലാം പരാജയപ്പെട്ടിരുന്നു. പിന്നീടാണ് എല്ആര്ഒ ഉപയോഗിച്ചെടുത്ത ചിത്രങ്ങള് നിരീക്ഷണവിധേയമാക്കുന്നത്.
ചന്ദ്രോപരിതലത്തില് ലാന്ഡര് കഷണങ്ങളായി കിടക്കുകയാണെന്നാണ് ചിത്രങ്ങളില് നിന്ന് തെളിഞ്ഞത്. ഇത് ഇടിച്ചിറങ്ങിയതു മൂലം ചന്ദ്രോപരിതലത്തില് മേല് മണ്ണ് തെന്നിമാറിയതായും കണ്ടെത്തിയിട്ടുണ്ട്. ചിത്രങ്ങളിലെ നിറവ്യത്യാസം വിലയിരുത്തിയാണ് ഷണ്മുഖ സുബ്രഹ്മണ്യന് ഇത് കണ്ടെത്തിയത്.
