ന്യൂദല്ഹി : സുപ്രധാന കാര്യങ്ങള് മറച്ചുവെച്ച് പൗരത്വം നേടിയെടുത്ത തെലങ്കാന എംഎല്എ ചിന്നമനേനി രമേശിന്റെ പൗരത്വം കേന്ദ്ര സര്ക്കാര് റദ്ദാക്കി. ജര്മ്മന് പൗരനായിരുന്ന ഇയാള് ചട്ടലംഘനം നടത്തിയാണ് പൗരത്വം നേടിയെടുത്തതെന്ന് അന്വേഷണത്തില് കണ്ടെത്തിയതിന്റെ അടിസ്ഥാനത്തിലാണ് ഈ നടപടി. നേരത്തെ ജര്മന് പൗരനായിരുന്നു രമേശ്.
മൂന്ന് തവണയായി വെമുലവാദ നിയോജക മണ്ഡലത്തില് നിന്നുള്ള തെലങ്കാന രാഷ്ട്രസമിതി എംഎല്എയാണ് രമേശ്. ബുധനാഴ്ചയാണ് ഇതുസംബന്ധിച്ച് ഉത്തരവിറക്കിയത്. പൗരത്വം നേടുന്ന വേളയില് സുപ്രധാന കാര്യങ്ങള് ഇയാള് മറച്ചുവെച്ചുവെന്ന് കണ്ടെത്തിയതിനെ തുടര്ന്ന് ബുധനാഴ്ച്ചയാണ് പൗരത്വം റദ്ദാക്കുന്നതായി കേന്ദ്ര ആഭ്യന്തര മന്ത്രാലയം നോട്ടീസ് നല്കിയത്.
നിയമ വിരുദ്ധമായാണ് രമേശ് ഇന്ത്യന് പൗരത്വം രമേശ് നേടിയതെന്നാണ് കണ്ടെത്തിയതെന്ന് 13 പേജുള്ള ആഭ്യന്തര മന്ത്രാലയത്തിന്റെ റിപ്പോര്ട്ടില് പറയുന്നുണ്ട്. ഇയാള് പൗരത്വത്തിന് അപേക്ഷിക്കുന്നതിന് മുമ്പും ശേഷവും വിദേശത്ത് പോയി എന്നും കണ്ടെത്തിയിട്ടുണ്ട്. ഇത് ചട്ടലംഘനമാണ്.
2009ലാണ് രമേശ് ഇന്ത്യന് പൗരത്വത്തിന് വേണ്ടി അപേക്ഷ നല്കിയത്. പൗരത്വത്തിന് അപേക്ഷ സമര്പ്പിക്കുന്നതിന് മുമ്പ് ഒരുവര്ഷം തുടര്ച്ചയായി ഇന്ത്യയില് താമസിക്കണമെന്നാണ് ചട്ടം. ഇതും രമേശ് പാലിച്ചിട്ടില്ല. അപേക്ഷ നല്കുന്നതിനു മുമ്പും ശേഷവും ഇദ്ദേഹം ജര്മ്മനിയില് പോയിരുന്നു.
രമേശിനെതിരെ പൗരത്വ വിവാദത്തില് നടത്തിയ അന്വേഷണത്തിലാണ് ഈ നടപടി. എന്നാല് തനിക്ക് അനുകൂലമായി തെലങ്കാന ഹൈക്കോടതിയുടെ ഉത്തരവുണ്ടെന്ന് രമേശ് അറിയിച്ചു. പൗരത്വം പുനസ്ഥാപിച്ചുകിട്ടാന് ഇനിയും ഹൈക്കോടതിയെ സമീപിക്കാനാണ് തീരുമാനമെന്നും അദ്ദേഹം കൂട്ടിച്ചേര്ത്തു.
